Aldaǵy bes aıda Shyǵys Qazaqstanǵa 800 myńǵa jýyq vaktsına jetkizilmek
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov óńirdegi iri kásiporyndardyń basshylarymen kezdesý ótkizdi, dep habarlaıdy QazAqparat tilshisi.
Kezdesý barysynda vaktsınatsııa pýnkterin ornalastyrý máselesi men ımmýndaý protsesi talqylandy.
«Vaktsınatsııa qazirgi tańda koronavırýstan qorǵaýdyń eń tıimdi jáne qaýipsiz ádisi. Bunyń pandemııamen kúrestegi eń durys sheshim ekenin bárimiz jaqsy túsinemiz. Búginde oblys halqynyń jartysynan kóbi maska taqpaı ketti. Álbette osy ýaqyt aralyǵynda jurtshylyq shekteýlerden sharshady, ári aýa temperatýrasy kóterilip, kún ysyp keledi. Alaıda osy rette áleýmettik jaýapkershilik týraly umytpaýymyz kerek. Qarapaıym erejelerdi saqtaı otyryp, adam ózin ǵana emes, jaqyndarynyń ómiri men densaýlyǵyn saqtaıdy», - deıdi Danıal Ahmetov.
Onyń aıtýynsha, bes aı ishinde Shyǵys Qazaqstan 800 myńǵa jýyq vaktsınamen qamtamasyz etiledi. Bul shyǵysqazaqstandyqtardyń 60%-ǵa jýyǵyn vaktsınatsııalaýǵa múmkindik bermek.
«Qazirgi ýaqytta óńir boıynsha 240 vaktsınatsııa pýnkti ashyldy. 14 sáýir kúni qosymsha 42 myń vaktsına jetkizildi. Jaqyn arada taǵy da iri partııa ákelinip, onyń 33 myńnan astamy ónerkásiptik kásiporyndarǵa beriledi», - dedi aımaq basshysy.
