Aldaǵy aptada jumysyn bastaıtyn kásipkerlik sýbektileriniń qyzmetin kimder paıdalanady
NUR-SULTAN. QazAqparat – Aldaǵy aptada elordada jumysyna ruqsat etilgen kásipkerlik sýbektileriniń qyzmetin kimder paıdalana alatyny belgili boldy, dep habarlaıdy QazAqparat tilshisi.
Qala ákimdigi baspasóz ortalyǵyndaǵy onlaın baspasóz máslıhatynda 20 sáýirden bastap jumysyn jalǵastyratyn kásiporyndar men qyzmet kórsetý oryndaryna kimder bara alatyndyǵy týraly saýal joldandy.
«Qazirgi kezde halyq karantınde. Avtokólik salony, kólik jýý, hımııalyq tazalaý sııaqty ashylatyn qyzmet kórsetý nysandaryna turǵyndar qalaı barady. Karantın kezinde adamdardyń qozǵalysyna shekteý engizilgen. Osy oraıda atalǵan qyzmet kórsetý oryndaryna barý tártibi qandaı?», - degen suraq qoıyldy.
Óz kezeginde elordanyń ınvestıtsııalar jáne kásipkerlikti damytý basqarmasynyń basshysy Erlan Bekmýrzaev atalǵan qyzmetterdi kimder paıdalanatynyn túsindirdi.
«Karantınniń basty maqsaty - ol koronavırýs ınfektsııasynyń taralýyna jol bermeý. Sondyqtan jumysyn jalǵastyratyn mekemelerdiń qyzmetkerleri, qurylys salasyndaǵylar, taksı, jedel járdem ókilderi atalǵan qyzmetterdi paıdalana alady», - dedi basqarma basshysy.
Eske sala keteıik, QR Prezıdenti Q. Toqaevtyń tapsyrmasyn júzege asyrý aıasynda Memlekettik komıssııa bıylǵy 20 sáýirden bastap qatań sanıtarlyq-epıdemıologııalyq sharalardy saqtaı otyryp, Nur-Sultan jáne Almaty qalalarynda jumysyn qaıta bastaıtyn kásipkerlik sýbektileriniń qyzmet túrleriniń tizimin bekitti.
Osy oraıda 20 sáýirden bastap elordada qandaı kásipkerlik sýbektileriniń jumysy jandanatyny aıtyldy.
Olardyń qatarynda: ónerkásiptik, óndiristik kásiporyndar; qurylys salasy (qurylys materıaldaryn óndirý jáne tasymaldaý, onyń ishinde joldardy salý men jóndeýmen aınalysatyn kompanııalar); sanıtarlyq-epıdemıologııalyq talaptardy kúsheıte otyryp, iri qurylys dúkenderi; kólik, qoımada saqtaý, aýyl sharýashylyǵy salasyna qyzmet kórsetý kompanııalary; avtokólik salondary, avtobólshekter satatyn dúkender jáne qyzmet kórsetý stantsııalary (výlkanızatsııa, kólik jýý); hımııalyq tazalaý, kir jýý qyzmeti; orgtehnıkany jóndeý.
Osy atalǵan salalar úshin jumys kestesi saǵat 9:00-den 18:00-ge deıin bekitildi.
Meıramhanalar men dámhanalardyń onlaın-tapsyrys boıynsha saǵat 22: 00-ge deıin jumysyn jalǵastyrady.
Sonymen qatar, ekinshi dárejeli bankter saǵat 9:00-den 16:00-ge deıin jumys isteıtin bolady. Qyzmetkerlerdiń jalpy sany 50% aspaýy kerek. Al notarıýstar aldyn ala jazylý arqyly jumysyn jalǵastyrady.
