Aldaǵy aptada T. Tóleshevtiń isi boıynsha jańa derekter jarııalanbaq - Bas prokýratýra
Tilshilerdiń qamaýǵa alynǵan iri kásipker Toqtar Tóleshevtiń isi boıynsha qoıǵan saýalyna Bas prokýror jańa derekter aldaǵy aptada jarııalanatynyn atap ótti.
Onyń sózine qaraǵanda, bul turǵyda isti sotqa joldaý, onymen tanysý jáne basqa da máseleler qamtylmaq.
«Aldaǵy aptada bul istiń qandaı kezeńde ekenin baıandap beremiz», - dedi J. Asanov.
Aıta keteıik, maýsym aıynyń basynda QR Bas prokýratýrasynda ótken brıfıngte QR Ulttyq qaýipsizdik komıteti baspasóz qyzmetiniń ókili Rýslan Karasev Toqtar Tóleshev bılikti kúshpen basyp alýǵa daıyndyq jumystaryn júrgizgenin málimdedi. «Tergeýmen Tóleshevtiń buryn bılikti kúshpen basyp alýǵa daıyndyq jumystaryn júrgizgendigi, al ótken jyldan beri belsendi naqty áreketter qoldanǵandyǵy jóninde tolyq málimetter alynǵan. Onyń áreket josparynda qaýyrttylyq oshaqtaryn qurý arqyly eldegi jaǵdaıdy turaqsyzdandyrý, narazylyq aktsııalaryn jáne jappaı tártipsizdikterdi uıymdastyrý, onyń aıasynda balama úkimetti qalyptastyrýdy josparlaý jáne áreket etýshi bılik qurylymyn ózgertý qarastyrylǵan», - dedi R. Karasev.
Atap aıtqanda, Ulttyq qaýipsizdik qyzmetkerlerimen Astana, Almaty jáne Shymkent qalalarynda Tóleshevtiń birqatar sybaılas jaqtastary tutqyndaldy. Olardyń qatarynda QR Bas prokýrorynyń burynǵy birinshi orynbasary, QR Konstıtýtsııalyq Keńesiniń burynǵy múshesi, ekinshi synypty ádilet keńesshisi Іlııas Baqtybaev, Ońtústik Qazaqstan oblysy Іshki ister departamentiniń burynǵy basshysy, general-maıor Hıbratýlla Dosqalıev, Ońtústik Qazaqstan oblysy ІІD bastyǵynyń burynǵy birinshi orynbasary, polıtsııa polkovnıgi Sáken Aıtbekov, QR Qorǵanys mınıstrligi «Ońtústik» aımaqtyq basshylyǵynyń 35748 jáne 55652 áskerı bólimderiniń komandırleri, polkovnıkter Bekzat Jumın jáne Qaırat Pernebaev bar. Atalǵan adamdar tutqyndalyp, ýaqytsha tergeý ızolıatoryna otyrǵyzyldy.
