Aldaǵy aptada Qazaqstanda kıik sanaǵy bastalady
ASTANA. QazAqparat - 2014 jyldyń 7 sáýirinde Qazaqstanda janýarlar álemi resýrstaryn saqtaý, qaıta óndirý jáne tıimdi paıdalaný baǵdarlamasyn iske asyrý aıasynda kıikterdiń betpaqdalalyq, ústirttik jáne oraldyq taralymdaryna avıasanaq jáne monıtorıng júrgizile bastaıdy.
«Atalǵan is-sharalardy QR QOSRM orman jáne ańshylyq sharýashylyǵy komıtetiniń «Ohotzooprom» óndiristik birlestigi júrgizedi. Sonymen qatar, osy jumysqa ǵalymdar, orman jáne ańshylyq sharýashylyǵynyń oblystyq aımaqtyq ınspektsııasynyń, erekshe qorǵalatyn tabıǵı aýmaqtar men qoǵamdyq tabıǵatty qorǵaý uıymdarynyń ókilderi tartylmaq», - delingen mınıstrlik baspasóz qyzmetiniń málimetinde.
Kıikterdi áýeden sanaý eki AN-2 ushaqtarynyń kómegimen júrgizilmek. Bir áýe kemesi kıikterdiń Betpaqdala taralymy arealynda, al ekinshisi Ústirt jáne Oral taralymdarynyń mekendeıtin jerlerinde qoldanylady.
Atap aıtqanda, 2014 jyly kıikterge avıasanaq júrgizý isine 230 ushý saǵaty bólinip otyr. Betpaqdala taralymy kıikterin sanaý Qaraǵandy jáne Qostanaı oblystarynyń aýmaqtarynda 10 sáýirde júrgizile bastaıdy.
Oral taralymyn sanaý 7 sáýirde bastalyp, Batys Qazaqstan oblysy aýmaǵynda ótedi. Al Ústirt taralymy kıikteriniń sanaǵy Aqtóbe oblysy aýmaǵynda, aqbókenderdiń oraldyq bettegi ósip-ónýi sanalyp bitkennen keıin júrgiziledi. Qazaqstandy mekendeıtin kıikterdiń naqty sany sanaq maǵlumattary óńdelgennen keıin anyqtalady.
2013 jylǵy maǵlumattar boıynsha Qazaqstandy mekendeıtin kıikter sany 187 myń basqa jetti. 2003 jylǵy derekterge sáıkes kıik sany 21 myń bas bolatyn.
