Aldaǵy aptada elordada Sırııa boıynsha kelissózder ótpeıdi - QR SІM

ASTANA. QazAqparat - Sırııadaǵy jaǵdaıdy retteý boıynsha kelissózderdiń kepilger elderi Astana protsesi aıasynda kezekti kezdesýdiń kún tártibin sarapshylyq deńgeıde kelisýge nıetti. Bul týraly «QazAqparat» HAA tilshisine QR SІM baspasóz qyzmetiniń jetekshisi Ánýar Jaınaqov málim etti.

«Astana protsesiniń kepilger elderinen kelip túsken aqparatqa sáıkes, Reseı, Túrkııa jáne Iran taraptary taıaý kúnder men aptalarda ózderiniń astanalarynda tıisti máseleler turǵysynda sarapshylyq deńgeıde kezdesýlerdi jalǵastyrady. Bul rette Sırııadaǵy shıelenisti tómendetý boıynsha qol jetkizilgen ýaǵdalastyqtardy iske asyrý, sondaı-aq jaýyngerlik is-qımyldardy doǵarý rejimin kúsheıtýge qatysty qadamdardy kelisý sharalary qamtylady»,-dedi Jaınaqov «QazAqparat» tilshisine.

Onyń sózine qaraǵanda, aldaǵy ýaqytta kepilger elder Sırııadaǵy ahýaldy retteý boıynsha birlese ázirlengen merzimderdi, úderiske qatysýshylar jaıynda jáne Astana protsesiniń kezekti kezdesýiniń kún tártibi turǵysynda qazaqstandyq tarapty aqparattandyryp otyrady.

Budan buryn QR Syrtqy ister mınıstri Qaırat Ábdirahmanov Sırııa ahýalyn beıbit retteý boıynsha Astana protsesiniń besinshi kezeńiniń aldyn ala datasyn habarlaǵan bolatyn.

«Aldyn ala josparda reseılik áriptesterimiz kelissózder boıynsha ózderiniń seriktesterine 12-13 maýsymda Astanada jınalýǵa usynys jasaıtyndyǵyn bizge habarlaǵan edi»,-dedi mınıstr.