Aldaǵy aptada bıznestiń shyǵynyn óteý máselesin kóteremiz— Raıymbek Batalov

NUR-SULTAN. QazAqparat – «Atameken» ulttyq kásipkerler palatasy bıznesti memleket tarapynan qoldaýdyń sharalaryn bekitpekshi. Palata tóralqasynyń tóraǵasy Raıymbek Batalov daǵdarysqa qarsy sharalar jónindegi shuǵyl shtabtyń jumysy týraly tikeleı efır barysynda osynaı málimet aıtty, dep habarlaıdy QazAqparat tilshisi.

«Bizge naqty usynystar, sonyń ishinde bıznesten usynystar alý mańyzdy. Men bárine naqty aıta alamyn, qol qýsyryp, qarap otyrǵan joqpyz. Usynystar daıyndap jatyrmyz. Usynatyn qoldaý sharalaryn qorǵap baǵamyz», – dedi ol kásipkerlerdiń salyq demalystary men nesıe tólemderin keıinge qaldyrý týraly suraqtaryna bergen jaýabynda.

Sondaı-aq, ol shuǵyl shtab jumysyna palatanyń búkil qurylymy tartylǵanyn atap ótti.

«Sebebi qazir túrli uıymdastyrýshylyq máselelerdi keıinge qaldyrý kerek. Kóptegen kásipkerler Reseıge qarsy sanktsııalardyń kúshine enýine baılanysty aıtarlyqtaı qıyndyqtarǵa tap bola bastady. Atap aıtqanda, kóbiniń júkteri shekara arqyly ótken kezde kesheýildep jatyr. Birinshi kezekte, osyndaı máselelerdi sheshý kerek. Aldaǵy aptada biz bıznestiń shyǵyndaryn óteý týraly másele qoıamyz. Shyǵyndardy óteý mıkrokásiporyndarǵa osy ýaqytqa deıin qoldanylyp kelgen paıyzdyq mólsherlemeni sýbsıdııalaý túrinde, iri kásiporyndarǵa qoldanystaǵy baǵdarlamalar boıynsha nesıelerdi kepildendirý, teńge baǵamymen baılanysty shyǵyndardy óteý sııaqty sharalardy qamtýy múmkin», - dedi Raıymbek Batalov.