Aldaǵy 7 jylǵa arnalǵan Ana men bala densaýlyǵyn saqtaý qyzmetin damytý tujyrymdamasy ázirlendi
ASTANA. QazAqparat – Qazaqstanda ana men bala densaýlyǵyn saqtaý qyzmetin damytý jónindegi 2023-2030 jyldarǵa arnalǵan tujyrymdamasy bekitilmek. Qujat-jobasy «Ashyq» NQA portalynda jarııalandy, dep habarlaıdy QazAqparat tilshisi.
«Joba QR orta merzimdi jáne uzaq merzimdi strategııalyq qujattaryn, BUU-nyń turaqty damý maqsattarynyń túıindi elementi retinde salaýatty ómir saltyn qamtamasyz etý jáne kez kelgen jasta barshanyń aman-caýlyǵyn arttyrýǵa járdemdesýde 3-shi ornyqty damý maqsattaryn iske asyrý úshin ázirlendi. Jobanyń maqsaty - turaqty damý maqsattaryna qol jetkizý jolynda ómirdiń barlyq kezeńderinde áıelder men balalardyń densaýlyǵyn qorǵaý júıesin jetildirý jáne ómir súrýdiń joǵary sapasyn qamtamasyz etý», - delingen qujatta.
Tujyrymdamany iske asyrý sheńberinde myna jumystar qolǵa alynady:
- «Keleshek» jol kartasyn ázirleý;
- Qyzdar men jasóspirimderdiń jynys músheleriniń damýyndaǵy týa bitken aýytqýlardy erte dıagnostıkalaýǵa, ýaqtyly hırýrgııalyq túzetýge reprodýktıvti fýnktsııany qalpyna keltirýge baǵyttalǵan «Senim» arnaıy baǵdarlamasyn ázirleý jáne iske asyrý;
- «Jasóspirimderdi adam papılloma vırýsyna qarsy vaktsınatsııalaý» baǵdarlamasyn nasıhattaý jáne odan ári iske asyrý;
- «Josparly júktilik» arnaıy baǵdarlamasyn ázirleý jáne iske asyrý;
- «Bolashaq ata-analarǵa arnalǵan check-up» (chek-ap) - júktilikti josparlaýǵa deıingi áıelder men erlerdiń densaýlyǵyn keshendi zertteý men saýyqtyrý baǵdarlamasyn ázirleý;
- Kúrdeli hırýrgııalyq gınekologııalyq aralasýlardy oryndaý úshin kishi ınvazıvti endovıdeohırýrgııany jetildirý;
- Emhanaǵa júgingen kúni júkti áıelderge keshendi medıtsınalyq kómektiń qoljetimdiligin qamtamasyz etý maqsatynda «Júkti áıelderge arnalǵan ashyq tereze» jobasyn iske asyrý;
- «Bosaný kezinde eki júkti áıelge 1 akýsher» qaǵıdatyn saqtaý, akýsherlerdiń róli men jaýapkershiligin arttyrý;
- Júkti jáne bosanǵannan keıingi áıelderdi balalarymen sanatorıı-kýrorttyq emdeýge jatqyzý úshin «Ana men bala» ortalyǵyn uıymdastyrý.
Osy jumystardy 2030 jylǵa deıin kezeń-kezeńimen oryndaý nátıjesinde jasóspirimder arasyndaǵy júktilik deńgeıin 1 000 adamǵa shaqqanda 1,9-ǵa tómendetý josparlanǵan.
Tujyrymdama 24 mamyrǵa deıin kópshilik talqylaýda bolady.
