Aldaǵy 7 jylda Almatynyń ekologııasy jaqsarady
Jańa qujatta qorshaǵan ortaǵa shyǵarylatyn lastaýshy zattardy tómendetý, sý synamalaryn jaqsartý, jasyl jelek aýmaǵyn arttyrý josparlanǵan.
E-gov elektrondyq portalynda «2018-2025 jyldarǵa arnalǵan qorshaǵan orta sapasynyń nysanaly kórsetkishterin bekitý týraly» Almaty qalasy máslıhatynyń sheshimi ornalastyryldy. Qujat 6 qarashaǵa deıin qoǵam talqylaýynda bolady.
Qujatqa sáıkes, 2025 jylǵa qaraı aýaǵa shyǵarylatyn lastaýshy zattardyń kólemi jylyna qazirgi 74 969 tonnadan 72 012 tonnaǵa tómendetilýi tıis.
Al avtokólikter bóletin zııandy zattardy jylyna 80 myń tonnadan 38 myń tonnaǵa azaıtý kózdelgen.
Eske salaıyq, Almaty ákimi Baýyrjan Baıbektiń aıtýynsha, sarapshylar 2035 jylǵa deıin qala halqy 3 mıllıonǵa jetetinin josparlaýda. Bul qazirgiden 30 paıyzǵa kóp.
Aldaǵy 15 jylda jaıaý júrginshiler men velosıpedshiler sany - 3 ese, qoǵamdyq kólikti paıdalanýshylar 4 ese artýy tıis. Al jeke kólik minetinder sol qalpynda - 600 myń shamasynda qalmaq.
«Bul maqsatqa jetý ońaı emes. Biraq, biz jetýge tyrysamyz. 2050 jylǵa taman qaıta óńdelgen qaldyqtar men tabıǵı energııa kózderi 10 ese artýy kerek», - degen bolatyn qala basshysy.
Búginde Almaty aýasy 2,5 mıkron (RM 2,5) dıametrli shań-tozańmen lastanǵan. Tólebı Amangeldi kósheleriniń qıylysyndaǵy bul kórsetkish qazir 0,5 mg/m3 quraıdy. 2025 jylǵa qaraı ony 0,160 m/m3 jetkizý kózdelgen.
Sondaı-aq Qazgıdromettiń №27-postynyń aýdanynda (Medeý meteostansasy, Gornaıa k-si, 548) atmosferada kúkirt dıoksıdiniń maksımaldy deńgeıiniń shekti ruqsat etilgen kontsentratsııasy 2,5 kórsetip otyr. Aldaǵy jyldary ony 0,56-ǵa túsirý josparlanǵan.
