Aldaǵy 6 jylda bolýy múmkin sý tapshylyǵy eldiń damýyna qaýip tóndiredi

ASTANA. QazAqparat - Sý paıdalaný deńgeıi tómendemese, 2029 jylǵa qaraı sý tapshylyǵy bolýy múmkin. Bul eldiń áleýmettik-ekonomıkalyq damýyna qaýip tóndiredi, dep habarlaıdy QazAqparat tilshisi.

«Sýarmaly eginshiliktiń negizgi úlesin quraıtyn eldiń ońtústik oblystarynda sý únemdeý tehnologııalaryn engizý deńgeıi tómen. Olar jalpy sýarmaly jerler kóleminiń 3%-da ǵana qoldanylady. Ekonomıka salalarynda jáne halyq arasynda sý resýrstaryn paıdalanýdyń aǵymdaǵy jaǵdaıy saqtalǵan jaǵdaıda 2029 jylǵa qaraı sý tapshylyǵyna baılanysty áleýmettik-ekonomıkalyq damý qarqynynyń tómendeý qaýpi bar», - delingen Ashyq NQA portalynda jarııalanǵan Sý resýrstaryn basqarý júıesin damytýdyń 2023-2029 jyldarǵa arnalǵan tujyrymdamasynda.

Bul rette Ekologııa mınıstrligi jerasty sýlaryn paıdalaný tóńiregindegi máselelerdi kótergen. Málim bolǵandaı, tapshylyqqa myna faktorlar sebep bolyp otyr:

- jer astyndaǵy sý qorlaryn ıgerý dárejesi tómen;

- jerasty sýlarynyń 90%-y tıisti norma mólsherinde paıdalanylmaıdy;

- jerasty sýlaryn qoldaný rejıminiń buzylýy, sondaı-aq ruqsat etilmegen bulaqtardan sý alý. Saldarynan qazir bar qorlar tez sarqylyp jatyr.

Budan ózge, magıstraldyq qubyrlar arqyly aýyl sharýashylyǵy maqsattaryna baǵyttalatyn sýdyń 19,8%-y tozǵan ınfraqurylym kesirinen ysyrap bolyp otyr.