Aldaǵy 5 jylda munaı baǵasy qalaı ózgeredi – mınıstrlik boljamy

ASTANA. QazAqparat – Ulttyq ekonomıka mınıstrligi optımıstik jáne pessımıstik stsenarıı boıynsha aldaǵy 5 jylǵa damý boljamyn jarııalady, dep habarlaıdy QazAqparat tilshisi.

Mınıstrlik usynyp otyrǵan optımıstik stsenarııde munaı baǵasy barreline 90 dollar bolady delingen. Mundaı jaǵdaıda jalpi ishki ónimniń ortasha jyldyq ósýi 6,6% bolyp, taýarlar óndirisi orta eseppen 5,7%, kórsetiletin qyzmetter óndirisi 7% artatyny boljanǵan.

Sondaı-aq qazaqstandyq eksporttyń aıasy keńeıip, onyń ishinde taýarlar eksportynyń kólemi 2024 jyly 89,3 mlrd dollar, 2028 jyly 102,3 mlrd dollar bolmaq.

«Import kólemi 2024 jyly 62 mlrd dollarǵa, 2028 jyly 69,1 mlrd dollarǵa deıin jetedi. Mundaı ósim respýblıkalyq bıýdjet kirisiniń ulǵaıýyna yqpal etedi. 2024 jyly bıýdjet kirisi 16 trln 455,1 mlrd teńge, 2026 jyly 18 trln 847,7 mlrd teńge kóleminde túsedi dep boljanyp otyr», - delingen josparda.

Al pessımıstik stsenarıı kezinde munaı baǵasy barreline 60 AQSh dollar kóleminde bolady. Ekonomıkanyń ortasha jyldyq ósýi 3,7%, taýarlar men kórsetiletin qyzmetter óndirisi tıisinshe 3 jáne 3,5% deńgeıinde ǵana qalady.

«Álemdik suranystyń azaıýy jáne taýar naryqtaryndaǵy baǵanyń tómendeýi qazaqstandyq eksportqa keri áserin tıgizedi. Taýarlar eksporty 2024 jyly 70,6 mlrd dollarǵa, 2028 jyly 79,1 mlrd dollarǵa ulǵaıady. Import kólemi 2024 jyly 45,2 mlrd dollar, 2028 jyly 61,6 mlrd dollar deńgeıinde bolady kútilip otyr. Ekonomıkanyń bulaısha baıaýlaýynan bıýdjet kirisi azaıyp, 2024 jyly 14 986,7 mlrd teńge, 2026 jyly 17 379,3 mlrd teńge bolady», - dep jazady mınıstrlik mamandary.

Bazalyq stsenarıı boıynsha munaıdyń álemdik baǵasy barreline 80 dollar shamasynda bolyp, bıýdjet kirisi 2024 jyly 16 trln 124 mlrd teńge, 2026 jyly 2026 jyly 18 trln 404,5 mlrd teńgege deıin artýy tıis. Jalpy ishki ónimniń ósý qarqyny 10,7% deńgeıinde bolmaq.