Aldaǵy 5 jylda Qazaqstannyń orman-toǵaıly aımaǵy 5 paıyzdy quraıdy

NUR-SULTAN. QazAqparat – Aldaǵy 5 jylda Qazaqstannyń orman-toǵaıly aımaǵy 5 paıyzǵa jetedi. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev «ECOJER» halyqaralyq kongresi barysynda aıtty, dep habarlaıdy QazAqparat tilshisi.

«Jahandyq temperatýranyń kóterilýimen kúreste batyl áreket jasaıtyn ýaqyt jetti. Ótken jyly biz ulttyq zańnamamyzdy qaıta qarap shyqtyq jáne jańa Ekologııalyq kodeks qabyldadyq. Bul sheshimder ázirleýde klımattyń ózgerýine beıimdelý protsesin jaqsyraq yqpaldastyrý úshin jasaldy», - dedi mınıstr.

Onyń atap ótýinshe, bul jergilikti deńgeıde, sonymen qatar klımattyń ózgerýine barynsha beıim sektorlarda turaqtylyqty arttyrýdyń tıimdi júıesin qurýǵa múmkindik berdi.

«Buǵan qosa Prezıdenttiń tapsyrmasy aıasynda aldaǵy 5 jyldyń ishinde parnıkti gazdardyń sińirilýin arttyrý úshin 2 mlrd aǵash otyrǵyzatyn bolamyz. Atalǵan is-sharalardyń nátıjesi respýblıka aýmaǵynda orman-toǵaıly aımaqty 5 paıyzǵa deıin jetkizýge múmkindik beredi. Mundaı tabıǵatqa baǵdarlanǵan sheshim klımattyń ózgerýi saldarynan qýańshylyq problemasyn tejeýge múmkindik beredi dep esepteımiz», - dedi Maǵzum Myrzaǵalıev.