Aldaǵy 5 jylda elimizdiń óńdeý ónerkásibi 40 paıyzǵa artady - E. Dosaev
ASTANA. 4 naýryz. QazAqparat - Aldaǵy ýaqytta elimizde óńdeý ónerkásibiniń ósimi de boljanady. Máselen, 5 jylda óńdeý ónerkásibi 40 paıyzǵa, taý-ken ónerkásibi 20 paıyzǵa artady.
Bul týraly búgin Májilistegi Úkimet saǵatynda Ekonomıka jáne bıýdjettik josparlaý mınıstri Erbolat Dosaev málim etti.
«Josparlanǵan ósim qarqyndaryn qamtamasyz etý jáne syrtqy táýekelderdiń Qazaqstan ekonomıkasyna jaǵymsyz yqpalyn tómendetý maqsatynda, sondaı-aq turaqty makroekonomıkalyq jaǵdaıdy qamtamasyz etý, ekonomıka ósimin saqtaý úshin 2013-2015 jyldarǵa arnalǵan daǵdarysqa qarsy jospar ázirlengeni belgili. Aqpan aıynyń basynda bul jospar jańartylyp, álemdik ekonomıka jáne munaı men metallýrgııanyń álemdik baǵasyna baılanysty yqtımal damý stsenarııleri eskerildi», - deıdi Erbolat Dosaev.
Onyń aıtýynsha, damýdyń úsh stsenarııi qarastyrylyp otyr. Olar - bazalyq, pessımıstik 1-shi jáne pessımıstik 2-si stsenarıı.
Bul rette damýdyń bazalyq stsenarııi sheńberinde Úkimet pragmatıkalyq-ekonomıkalyq saıasat ustanady. Ol ekonomıkany ártaraptandyrý, keń aýqymdy kásipkerlikti damytý, ınnovatsııany jandandyrý jáne jańa jumys oryndaryn qurý negizinde josparlanǵan serpindi ósýdi qamtamsyz etedi.
«Makroekonomıkalyq saıasatty qamtý úshin bıýdjettik saıasattyń teńgerimdiligine jáne memlekettik shyǵystardyń tıimdiligin arttyrýǵa jańa tásilder ázirlenetin bolady. Memlekettik boryshty jáne memlekettik qarjynyń turaqtylyǵyn qalypty deńgeıde ustaý úshin jalpy ishki ónimge qatysty bıýdjet tapshylyqtaryn, munaı emes sala tapshylyǵynyń ósýin tejeý josparlanǵan. Kvazımemlekettik sektor boryshynyń ósýin baqylaý qamtamasyz etiledi», - dedi mınıstr. Onyń sózine qaraǵanda, Ulttyq qorda munaı tabystaryn jınaqtaý jáne olardy el damýynyń strategııalyq maqsattary úshin tıimdi paıdalaný saıasaty budan ári de jalǵasatyn bolady.
