Aldaǵy 5 jylda 500 myń adam agroónerkásip kesheninde jumyspen qamtylady
«Jalpy, koronavırýs pandemııasy jaǵdaıynda búkil álemde eldiń azyq-túlik qaýipsizdigin qamtamasyz etýdegi aýyl sharýashylyǵynyń róline degen jalpy túsiniktiń óskenin atap ótkim keledi. Sondyqtan Qazaqstan men kóptegen memleketter úshin ımportty almastyrý máselesi basymdyqqa ıe. Júrgizilip jatqan jumys 2023 jyldyń sońyna qaraı ımportqa táýeldilik máselelerin sheship, elimizdiń azyq-túlik qaýipsizdigin qamtamasyz etýge múmkindik beredi. Bul rette basymdyq ınflıatsııaǵa áser etetin azyq-túlik taýarlaryna beriletin bolady», - dedi agroónerkásiptik keshendi damytýdyń negizgi baǵyttary jáne ınvestıtsııalyq jobalardyń iske asyrylýy týraly baıandaǵan Saparhan Omarov.
Sonymen qatar ol Memleket basshysynyń tapsyrmasyn oryndaý úshin qazirgi ýaqytta kelesi bes jylǵa arnalǵan jańa Agroónerkásip keshenin damytý jónindegi ulttyq joba agrobıznes, ǵylym ókilderi tarapynan talqylanyp jatqanyn aıtty.
«Júrgizilip jatqan is-sharalardyń nátıjesinde 5 jyl ishinde eńbek ónimdiligin 2,5 esege arttyrý, ónim eksportyn, aýyl sharýashylyǵy jumyskerleriniń tabysyn 2 esege ulǵaıtý, sondaı-aq salaǵa 4,1 trln teńge ınvestıtsııa tartý josparlanǵan. Bul qosymsha 500 myńǵa jýyq adamdy jumyspen qamtýǵa múmkindik beredi», - dedi mınıstr.