Aldaǵy 5 jylda 30-dan astam iri farmatsevtıka óndirisi ashylady - Asqar Mamın
NUR-SULTAN. QazAqparat – Premer-Mınıstri Asqar Mamın otandyq farmatsevtıka óndirisin damytý jóninde birqatar tapsyrma berdi, dep habarlaıdy QazAqparat tilshisi.
«Búgin usynylǵan Farmatsevtıka jáne medıtsına ónerkásibin damytýdyń 2025 jylǵa deıingi keshendi jospary boıynsha 30-dan astam jańa iri farmatsevtıka óndiristeri iske qosylady, bul dárilik zattardy óndirý kólemin 2,5 ese, eksportty 3 ese ósirýge, 2 myńnan astam joǵary bilikti mamandardy daıarlaýǵa jáne olarǵa turaqty jumys oryndaryn qurýǵa múmkindik beredi. Jalpy, osy qabyldanyp jatqan júıeli sharalar halyqtyń densaýlyǵyn saqtaýǵa yqpal etedi», - dedi Premer-Mınıstr búgingi Úkimet otyrysynda.
Úkimet basshysy Keshendi jospar jobasyn maquldap, jaýapty memlekettik organdarǵa ony sapaly jáne ýaqtyly iske asyrýdy tapsyrdy.
«Sonymen qatar mynadaı mańyzdy máselelerge nazar aýdarý qajet. Birinshiden, barlyq ınvestıtsııalyq jobalardy tabysty iske asyrý úshin otandyq farmatsevtıka óndirisi úshin, ásirese klınıkalyq synaý jáne klınıkaǵa deıingi synaý bóliginde memlekettik qoldaý sharalaryn aýqymdy túrde keńeıtý qajet. Indýstrııa, Densaýlyq saqtaý jáne Syrtqy ister mınıstrlikteri dári óndirisin elimizde oqshaýlaýǵa Big Pharma – Top 50 tiziminen álemdik farmatsevtıka óndirýshilerdi tartý boıynsha usynystar engizsin», - dedi A. Mamın.
Ekinshiden, Densaýlyq saqtaý mınıstrligi uzaq merzimdi kelisimsharttardy iske asyrý mehanızimin keńeıtip, eldegi dárilik zattarǵa qajettilikterdi naqty josparlaý men aıqyndaýy qajet.
«Medıtsına buıymdary men dárilerdi synaqtan ótkizetin zerthanalardyń materıaldyq-tehnıkalyq bazasyn kúsheıtý qajet. Keshendi jospardyń iske asyrylýyn eskere otyryp, farmatsevtıka salasy úshin bilikti kadrlardy daıarlaý jóninde sharalar qabyldansyn. Úshinshi, oblystardyń, Nur-Sultan, Almaty jáne Shymkent qalalarynyń ákimdikteri jergilikti jerlerde dárilik zattar men medıtsınalyq buıymdardy satyp alǵan kezde jergilikti qamtý boıynsha nysanaly ındıkatorlardy (KPI) bekitsin», - dedi Premer-Mınıstr.
Aıta keteıik, Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov «Farmatsevtıkalyq jáne medıtsınalyq ónerkásipti damytýdyń 2020-2025 jyldarǵa arnalǵan keshendi josparyn» tanystyrdy.
Bıyl farmatsevtıka ónerkásibinde – 34,1%, ınvestıtsııalarda 5,2% serpindi ósý baıqalady.
