Aldaǵy 4 jylda aýyldardaǵy ınfraqurylymǵa 670 mlrd teńge bólinedi
«2022 jyly damý áleýeti bar 492 aýylda 914 jobany iske asyrýǵa 100 mlrd teńge bólindi. Bul qarajat turǵyn úı-kommýnaldyq sharýashylyq salasynda 95 jobany, 313 áleýmettik ınfraqurylymdy, onyń ishinde 123 bilim berý jobasyn, 51 densaýlyq, 62 mádenıet jáne 77 sport jobasyn iske asyrýǵa múmkindik beredi. Sonymen qatar, 506 kólik ınfraqurylymy jobasy júrgiziletin bolady», - dedi Á. Qýantyrov.
Onyń aıtýynsha, Memleket basshysynyń tapsyrmasyna sáıkes, «Aýyl – El besigi» batys jáne ońtústik oblystarǵa halyqty áleýmettik-mádenı, sport jáne bilim berý ınfraqurylymyn damytý úshin 20 mlrd teńge kóleminde qarajat bólý josparlanýda. Bólinetin qarajat aıasynda mektepter, aýrýhanalar, mádenıet úıleri, sport nysandaryn salý, qaıta jańǵyrtý jáne jóndeý boıynsha jobalar tańdaldy.
«Ózderińizge belgili, qarajat bólý máselesi 2022 jylǵa arnalǵan respýblıkalyq bıýdjetti naqtylaý aıasynda Parlamentte qaralyp jatyr. Infraqurylymdyq damý jónindegi is-sharalardy iske asyrý Óńirlik standarttar júıesine sáıkes júzege asyrylatyn bolady. Qazirgi ýaqytta, Óńirlik standarttarda aýyldar úshin 12 kórsetkish (obektiler/qyzmetter) qarastyrylǵan, aýyldyq okrýg ortalyqtaryna - 24, aýdan ortalyqtaryna – 32.
2021 jyldyń qorytyndysy boıynsha óńirlik normatıvterge sáıkes, aýyldardy standarttardyń ortasha qamtamasyz etý 64,1%-dy qurady. Onyń eń joǵary kórsetkishi Atyraý, Mańǵystaý, Qostanaı, Soltústik Qazaqstan oblystarynda baıqaldy. Tómen kórsetkishter Qyzylorda, BQO, Almaty oblysynda baıqalady», - dedi mınıstr.
Onyń sózine qaraǵanda, jalpy jobany júzege asyrýdyń úsh jyly ishinde 206 mlrd teńge bólindi.
«Aldaǵy 4 jylda aýyldy eldi mekenderdiń ınfraqurylymdyq máselelerin sheshýge taǵy 670 mlrd teńge qajet etedi. Bul 3,5 myńnan astam aýyldaǵy 7 mln aýyl turǵynynyń ómir súrý deńgeıin jaqsartýǵa múmkindik beredi», - dedi Á. Qýantyrov.
Budan buryn habarlanǵandaı, «Aýyl – El besigi» jobasy aıasynda damý áleýeti bar 3,5 myń aýyl tańdaldy .
2019 jyly elimizde «Aýyl – El besigi» baǵdarlamasy iske asyryla bastady .
Onyń basty maqsaty — aýyldaǵy adamdardyń ómirin jaqsartý. Jol qurylysy, sýmen qamtamasyz etý, densaýlyq saqtaý, bilim berý, mádenıet, sport nysandaryn qaıta jańartý jáne jańa nysandar salý, jumys oryndaryn qurý — osynyń barlyǵy atalǵan baǵdarlamany iske asyrýdy kózdeıdi.
