Aldaǵy 4 jylda 10 memlekettik organ «e-Statıstıka» júıesimen ıntegratsııalanady - Á. Smaıylov
ASTANA. QazAqparat - Aldaǵy 4 jyl ishinde elimizdiń 10 memlekettik organy «e-Statıstıka» aqparattyq júıesimen ıntegratsııalanatyn bolady. Bul týraly búgin Parlament Májilisinde QR Ulttyq ekonomıka mınıstrligi Statıstıka komıtetiniń tóraǵasy Álıhan Smaıylov málim etti. Eske salaıyq, Májiliste Statıstıka komıtetiniń aqparattyq júıelerin memlekettik organdardyń aqparattyq júıelerimen ıntegratsııalaý jáne memlekettik organdarda ákimshilik esepke alý nysandaryn utymdy etý barysy talqylanǵan bolatyn.
Komıtet basshysynyń aıtýyna qaraǵanda, 2009 jyldan beri statıstıka salasynda memlekettik organdardyń aqparattyq júıesimen ıntegratsııalaý jumystary júrgizilýde. Soǵan oraı, byltyrǵy jyly «e-Statıstıka» aqparattyq júıesine Qurylys isteri komıtetiniń memlekettik jer kadastri, Turǵyn úı kommýnaldyq sharýashylyǵy jáne jer resýrstaryn basqarý komıteti, sondaı-aq «Shyǵys Qazaqstan oblysy ákiminiń sıtýatsııalyq ortalyǵy» qosylǵan. Nátıjesinde qazirgi tańda «e-Statıstıka» aqparattyq júıesine ıntegratsııalanǵan memlekettik organdar sany 20-ǵa jetip otyr.
«Aldaǵy josparǵa kelsek, bizdiń komıtet «e-Statıstıka» aqparattyq júıesimen ıntegratsııalaý baǵytynda arnaıy Jol kartasyn ázirledi. Ol boıynsha aldaǵy tórt jylda atalǵan júıege taǵy 10 memlekettik organdy ıntegratsııalaý qarastyrylady. Bulpardyń arasynda 2015 jyly Energetıka mınıstrligine qarasty «Jer qoınaýyn paıdalanýshylardy basqarýdyń biryńǵaı memlekettik júıesi», «QR tabıǵı baılyqtarynyń memelkettik kadastri», «Investıtsııa jáne damý mınıstrliginiń «Jobalar keńsesi» jobalardy basqarýdyń júıesi bar», - deıdi Á. Smaıylov.
Onyń sózine qaraǵanda, jospar boıynsha 2016 jyldary Qarjy mınıstrliginiń memlekettik satyp alýlar veb-portaly, 2017 jyly QR Ulttyń bankiniń shlıýzi, 2018 jyly Qarjy mınıstrliginiń ıntegratsııalanǵan salyqtyq aqparattyq júıesi «e-Statıstıka» júıesine qosylatyn bolady. «Jalpy, memlekettik organdardyń aqparattyq júıelerin ıntegratsııalaý tikeleı málimetter bazasy arqyly elektrondyq túrde málimet almasýǵa múmkindik berip, statıstıka óndirisi úshin ákimshilik málimetterdi meılinshe qamtýǵa septigin tıgizedi. Bul óz kezeginde statıstıka sapasyn jaqsartyp, respondertterge túsetin aýyrtpashylyqty azaıtady», - dedi komıtet basshysy.
