Aldaǵy 4-5 jylda sertıfıkattaý zerthanasynyń úshten biri jańǵyrtylady – Baqyt Sultanov

NUR-SULTAN. QazAqparat - QR Saýda jáne ıntegratsııa mınıstri Baqyt Sultanov beıindi emes úkimettik emes uıymdardyń ókilderimen bolǵan kezdesýde sertıfıkattaýdy júrgizý úshin synaq bazasynyń damýy týraly aıtyp berdi, dep habarlaıdy QazAqparat Saýda jáne ıntegratsııa mınıstrliginiń Tehnıkalyq retteý jáne metrologııa komıtetine silteme jasap.

Mınıstr aldaǵy 4-5 jylda 900 (882) synaq zerthanasynyń úshten biri (10 jyldan astam jabdyqtaý) jańǵyrtylatynyn habarlady. Bul ekonomıkalyq ósý jónindegi ulttyq jobanyń bóligi.

Jańǵyrtý barysynda akkredıttelgen synaq zerthanalarynda bar jabdyq aýystyrylady, ónimniń jańa ataýlaryn synaý úshin jabdyq satyp alynady nemese zerthanalyq synaqtarǵa qajettilikti qamtamasyz etý maqsatynda jańa zerthanalar qurylady.

Qazaqstanda zerthanalyq bazasy 10 jyldan astam ýaqyt buryn óndirilgen synaq jabdyqtarynan turady. Sovet zamanynan qalǵan qural-jabdyqtar da bar.

Mınıstr bıyl Nur-Sultanda shaǵyn turmystyq aspaptan bastap júk avtomobılderine deıin elektromagnıttik úılesimdilikke sertıfıkat synaǵyn júrgizýge bolatyn úlken Eho-kamera týraly aıtyp berdi.

«Bul álemdegi eń jaqsy zerthanalardyń biri. Mundaı úlken synaq zerthanalary TMD-da joq», - dedi mınıstr.

Kezdesýde B.Sultanov kásipkerlerdi, ásirese sertıfıkattaý, zerthana sýbektilerin áriptestikke, zerthanalyq bazany jańǵyrtýǵa ınvestıtsııa salýǵa shaqyrdy.

«Naryq básekege qabiletti baza olardyń qyzmetterine suranysty keńeıtetinin túsinýi kerek» - B.Sultanov.

Búgingi tańda Qazaqstanda akkredıttelgen 882 synaq zerthanasy bar.