Aldaǵy 3 jylda Aqmolada úsh aýysymda oqytý máselesi tolyq sheshiledi
KÓKShETAÝ. QazAqparat – Aqmolada 2020-2025 jyldarǵa arnalǵan bilim jáne ǵylymdy damytýdyń memlekettik baǵdarlamasy sheńberinde úsh aýysymdy oqytý máselesin tolyq sheshý josparlanyp otyr, dep habarlaıdy QazAqparat tilshisi oblystyq bilim basqarmasynyń baspasóz qyzmetine silteme jasap.
«2016-2019 jyldarǵa arnalǵan memlekettik baǵdarlamadaǵy mindetter tolyq oryndaldy. Oblys boıynsha 3 jyl ishinde 58 mektepke deıingi bilim berý nysany ashyldy. Osynyń arqasynda balalardyń mektepke deıingi bilim jáne tárbıemen qamtylý kórsetkishi 100 paıyzǵa oryndaldy. Sonymen birge, óńirdegi mektepterde úsh aýysymdy oqytý máselesi kezeń-kezeńimen sheshilip keledi. Aldaǵy 3 jyl ishinde bul máseleni tolyq sheshý josparlanǵan. Osy baǵytta jańa mektepter men qosymsha oqytý korpýstary salynatyn bolady», – deıdi Aqmola oblystyq bilim basqarmasynyń basshysy Beıbit Júsipov.
Vedomstvodan atap ótkendeı, sonymen qatar, óńirdegi bilim berý nysandaryna jóndeý jumystaryn júrgizýge de kóńil bólinýde.
«Bıylǵy jyly «Jumyspen qamtýdyń jol kartasy» baǵdarlamasy boıynsha bilim berý nysandaryna aýqymdy jóndeý jumystary josparlanyp otyr. Jospar boıynsha barlyǵy 127 joba júzege asyrylatyn bolsa, onyń ishinde 9 joba qurylys jáne qalpyna keltirý boıynsha, 29 joba kúrdeli jóndeý jumystary jáne 89 joba aǵymdaǵy jóndeý jumystary boıynsha. Búgingi tańda 103 joba boıynsha merdigerlermen kelisimshart jasalyp, qalǵan 24 nysan boıynsha konkýrstyq rásimder júrgizilýde. Buǵan qosa, «Aýyl besigi» jobasy boıynsha 7 bilim berý mekemesine kúrdeli jóndeý jumystary júrgiziletin bolady», - dep tolyqtyrdy vedomstvodan.
Aıta keteıik, atalmysh jobalardy júzege asyrý sheńberinde óńirde 3,2 myń jańa jumys orny ashylady, onyń 1,6 myńy jumyspen qamtý ortalyqtary arqyly.
