Aldaǵy 3-5 jylda elordada úı qurylysynyń qarqyny báseńdeıdi

ASTANA. QazAqparat – Ashyq talqyǵa shyǵarylǵan «Astana qalasynyń turǵyn úı qoryn renovatsııalaý jáne modernızatsııalaýdyń 2028 jylǵa deıingi memlekettik baǵdarlamasynda» shamadan tys júktememen jumys istep turǵan ınjenerlik ınfraqurylymnyń jaǵdaıy sıpattalǵan, dep habarlaıdy QazAqparat tilshisi.

«Elordanyń jańa bas josparyndaǵy boljamǵa saı, 2035 jylǵa qaraı Astana qalasynyń halqy shamamen 2,3 mln adamǵa jetedi. Bul óz kezeginde dereý sheshýdi qajet etetin tyń talaptar qoıady. Turǵyn úıge degen joǵary suranystyń joǵary bolýy sebebinen baspana qurylysynyń qarqyny joǵary. Tıisinshe ol ınjenerlik kommýnıkatsııaǵa aıtarlyqtaı júk túsiredi. Sonymen qatar, jyl saıyn boı kóterip jatqan 3 mln sharshy metr turǵyn úıge ınjenerlik ınfraqurylym salý úshin 200 mlrd teńgeden astam qarajat bólý kerek», - delingen qujatta.

Sondyqtan bul túıtkildi sheshý úshin aldaǵy 3-5 jylda salynatyn turǵyn úı kólemin ınjenerlik-kommýnıkatsııalyq ınfraqurylymnyń qaýqaryna qaraı ıkemdeý usynylady.

Atap aıtqanda, jyl saıyn salynatyn baspana kólemin 3 mln-nan 1,5 mln sharshy metrge deıin qysqartý kózdelip otyr.

«Injenerlik-kommýnıkatsııalyq ınfraqurylym jobalaryn iske asyrýdyń aıaqtalýyna qaraı, ıaǵnı 2025-2028 jyldary ǵana turǵyn úı qurylysynyń qarqynyn ulǵaıtýǵa bolady», - delingen Astananyń turǵyn úı qoryn renovatsııalaý jáne modernızatsııalaý baǵdarlamasynda.

Qosa ketsek, buǵan deıin elordadaǵy turǵyn úı qoryn renovatsııalaý jáne modernızatsııalaý baǵdarlamasy aıasynda bas shahardyń birneshe aýdanyndaǵy úılerdi taıaý arada súrý josparlanǵanyn jazyp edik.