Aldaǵy 2 jylda elordada 40 mektep salynady
ASTANA. QazAqparat – Aldaǵy 2 jylda elordada 40 mektep salynady. Bul týraly elimizdiń áleýmettik-ekonomıkalyq damýy jónindegi keńeste Astana ákimi Jeńis Qasymbek aıtty, dep habarlaıdy QazAqparat tilshisi.
«Elorda turǵyndarynyń ortasha jasy 30 jasty quraıdy. Jyl saıyn qalada 30 myńnan astam bala dúnıege keledi. Eki jyl ishinde memlekettik-jeke áriptestik qaǵıdatyna sáıkes jeke ınvestıtsııalar esebinen 30 balabaqsha salynatyn bolady. Eki jylda 40 mektep salýdy josparlap otyrmyz, onyń ishinde qazirgi kúni jergilikti bıýdjet esebinen - 11 mektep, jeke ınvestıtsııa esebinen - 4 mektep. Sondaı-aq,bıyl «Jaıly mektep» jobasy boıynsha 24 mekteptiń qurylysyn bastaıtyn bolamyz. Bul elordadaǵy oqýshy oryndary tapshylyǵy máselesin tolyǵymen sheshýge múmkindik beredi» – dedi qala basshysy.
Ol elordada medıtsınalyq klaster qalyptasqanyna nazar aýdartty.
«Sapaly medıtsınalyq kómek kórsetý úshin Densaýlyq saqtaý mınıstrligimen birlese 12 joba júzege asyrylýda: 2 perınataldy ortalyq pen turǵyndarǵa qoljetimdi 8 ambýlatorlyq keshen, medıtsınalyq jáne ońaltý ortalyqtary. Atalǵan is-sharalardyń barlyǵy Astana qalasynyń jańartylǵan bas josparynda jáne basqa da strategııalyq qujattarda kózdelgen», - Jeńis Qasymbek.
