Aldaǵy 10 jylda Ortalyq Azııa elderine 170 mlrd dollar ınvestıtsııa tartylady – QR Prezıdenti
«Aımaqtyń áleýmettik-ekonomıkalyq turaqtylyǵyn nyǵaıtý qazir kóp jaǵdaıda ınvestıtsııa tartýǵa baǵyttalǵan sharalardyń tıimdiligine baılanysty. Halyqaralyq sarapshylar aldaǵy 10 jylda bizdiń shetelden tikeleı ınvestıtsııa tartý jónindegi áleýetimizdi shamamen 170 mıllıard dollar, sonyń ishinde shıkizattyq emes sektorǵa shamamen 70 mıllıard dollar kóleminde bolady dep boljap otyr», - dedi Qazaqstan Prezıdenti Ortalyq Azııa memleketteri basshylarynyń IV Konsýltatıvtik kezdesýinde.
Osy oraıda Memleket basshysy «Astana» halyqaralyq qarjy ortalyǵy óńirlik jobalarǵa tikeleı jáne portfeldik ınvestıtsııalardy yntalandyrýdaǵy tıimdi platforma bola alatyndyǵyn aıtty.
«Astana» halyqaralyq qarjy ortalyǵy álemdik qarjy ınstıtýttarynyń tájirıbesi men jańa tetikterin usyna alady. Ortalyqqa qazirdiń ózinde álemniń 64 elinen 1400-den astam kompanııa tirkelgen. «Astana» halyqaralyq qarjy ortalyǵyna tirkelgen sheteldik kompanııalardyń kópshiligi óz bıznesterin Qazaqstan aýmaǵynda ǵana emes, kórshiles elderde de júrgizgisi keledi. Aımaqtyń ınvestıtsııalyq tartymdylyǵyn arttyrý úshin jańa «AIFC Multipass» ónimi ázirlendi. Bul – «Astana» halyqaralyq qarjy ortalyǵy seriktesteriniń iskerlik maqsatpen qatysýshy-memleketterdiń aýmaǵynda kedergisiz júrýine múmkindik beretin erekshe mártebege ıe vıza. Bul Ortalyq alańy ekijaqty jáne kópjaqty yntymaqtastyqtyń kez-kelgen formatyn ótkizýge ashyq», - dedi Qasym-Jomart Toqaev.
