Aldaǵy 10 jylda elde 2 túrli dıversıfıkatsııalaý sharalary júzege asady - Q.Kelimbetov
ASTANA. Qańtardyń 25-i. QazAqparat /Aıdar Ospanalıev/ - Qazaqstanda aldaǵy 10 jylda 2 túrli dıversıfıkatsııalaý sharasy júzege astyn bolady.
Bul týraly «Samuryq-Qazyna» ál-aýqat qorynyń Basqarma tóraǵasy Qaırat Kelimbetov qańtardyń 21-i men 23-i aralyǵynda Máskeýde ótken «Reseı jáne álem: jańa myńjyldyqtaǵy jańa talaptar» atty halyqaralyq konferentsııa barysynda málim etti, dep habarlaıdy QazAqparat.
Onyń sózine qaraǵanda, dıversıfıkatsııalaý sharalarynyń birinshi túri shıkizat pen oǵan qatysty salalar boıynsha júzege asady. «Bizde munaı kóp, sondyqtan, munaı-hımııasyn damytýymyz kerek. Sondaı-aq bizde túrli-tústi metaldar da barshylyq. Endeshe sol metaldardyń túrleri men oǵan qatysty salalardy damtqan jón. Basqasha aıtqanda, biz energetıkalyq effektini túsinýimiz kerek. Eger bizde agrarlyq ónim mol bolsa, onda Kedendik odaq kólemindegi ortaq rynokta agroóńdeýdi damytýdyń bolashaǵy zor. Al dıversıfıkatsııanyń ekinshi túri bıznes-bastamalar, joǵary tehnologııalyq transfertter men ekonomıkada jaqyn arada paıda bolatyn qyzmet kórsetý salalarynyń arqasynda damıdy», dedi Q.Kelimbetov.
Sondaı-aq Qazaqstannyń da, Reseıdiń de ınnovatsııalyq damý múmkindikteri zor ekendigin atap kórsetken Basqarma tóraǵasy osy kezde eki elge ózderiniń basymdyqtaryn anyqtap, sol salalardy damytýǵa qazirdiń ózinde kúsh salý qajettigin jetkizdi.
Sondaı-aq Q.Kelimbetovtyń sózine qaraǵanda, «Samuryq-Qazyna» qory ındýstrııaldyq baǵdarlamanyń júzege asýyna óz quramyndaǵy damý ınstıtýttary arqyly qatysa alady jáne Qordyń Qazaqstan aýmaǵyndaǵy jobalarǵa tikeleı sheteldik ınvestıtsııalar tartý múmkindigi de bar. Búginde Qor quramynda «Qazaqstan Damý banki», «Damý» kásipkerlikti damytý qory», «Qazyna kapıtal menedjment», «Qazaqstannyń ınvestıtsııa qory», «Eksporttyq operatsııalardy saqtandyrý memlekettik korporatsııasy» sııaqty damý qorlary bar. Olar osy kezde bas-aıaǵy 212 jobany maquldap, onyń 160-y qarjylandyrylý ústinde. Sondaı-aq quny 25,7 mıllıard AQSh dollaryn quraıtyn taǵy 33 joba qarastyrylýda. Olardyń 3-ýi qazirdiń ózinde qarjylandyryla bastady. Búkil jobalar sátimen júzege assa, elde 46 000 jumys orny paıda bolady dep kútilýde.
