Aldaǵy 1-2 jylda «Samuryq-Qazyna» qorynyń basqarýshy mamandary 30 paıyzǵa jańarady - Ó.Shókeev
Bul týraly búgin QR Prezıdentiniń «Bolashaq» halyqaralyq baǵdarlamasyn iske asyrý qorytyndylaryna arnalǵan Úkimet otyrysynda atalǵan qordyń basqarma tóraǵasy Ómirzaq Shókeev aıtty.
Memleket basshysynyń tapsyrmasyna oraı qordyń basqarý júıesin, kadrlaryn jańartý úderisi bastalǵanyn atap ótken Ó.Shókeev: «Bir-eki jyldyń ishinde 30 paıyzǵa deıin basqarýshy mamandar jańartylady degen oıdamyz», - dedi.
Qor basshysynyń atap ótýinshe, belgili halyqaralyq deńgeıdegi ádistemege sáıkes basqarma basshylary, olardyń orynbasarlary, basqarýshy dırektorlar, departament dırektorlary testten ótetin bolady.
«Onyń ishinde tıisti basqarý jáne kásibı tájirıbesin eskere otyryp, «Bolashaq» baǵdarlamasy túlekteriniń qatarynan kadrlar daıarlaýdy kózdep otyrmyz», - dedi ol.
Onyń aıtýynsha, ótken jyldan beri qordyń ishinde «TOR-100» arnaıy kadrlyq rezerv qalyptasqan. Ol tizimge biliktiligi asa joǵary qyzmetkerler irikteledi.
