Aldaǵy jyly Abaı oblysynda óńirdegi eń iri et óńdeý zaýyty iske qosylady

ASTANA. KAZINFORM – Bul týraly QR Aýyl sharýashylyǵy mınıstri Aıdarbek Saparovtyń Abaı oblysyna sapary barysynda málim boldy.

Mınıstrliktiń baspasóz qyzmetiniń habarlaýynsha, Aıdarbek Saparov sapar barysynda Abaı oblysyndaǵy agrarlyq jobalardyń iske asyrylý barysymen tanysty.

Mınıstr onda mal sharýashylyǵy men aýyl sharýashylyǵy ónimderin qaıta óńdeý baǵytyndaǵy jobalardyń oryndalý barysymen, sondaı-aq egin jınaý jumystarynyń qarqynyna nazar aýdardy.

«Prezıdenttiń tapsyrmasyna sáıkes, agrarlyq sektordaǵy memlekettik saıasattyń basym baǵyty – ónimdi tereń óńdeý men onyń qosylǵan qunyn arttyrýǵa baǵyttalǵan. Osy baǵytta Abaı oblysynyń belsendiligi joǵary ekenine kýá boldyq», – dedi Aıdarbek Saparov.

Mınıstr «ARAI-EAST FOOD» kásipornyna bardy. Bul kásiporyn «Halal» standarty boıynsha shujyq jáne et delıkatesteri ónimderin óndirýge mamandandyrylǵan.
Jyldyq óndiris qýaty – 1,8 myń tonna daıyn ónim, sondaı-aq, 100-den astam ónim túrlerin qamtıdy.

Odan keıingi nysan - «Eurasia Agro Semey» kompanııasy da óńirdegi iri jobalardyń biri – et óńdeý zaýytynyń qurylysyn iske asyryp jatyr. Bul joba bolashaqta tolyq óndiristik tsıkldi qamtıtyn et klasteriniń ózegine aınalmaq.
Jobanyń jalpy ınvestıtsııa kólemi – 7,7 mlrd teńge, onyń ishinde 4,5 mlrd teńge Soltústik Qazaqstan oblysynyń tabysty tájirıbesin taratý aıasynda bólinbek. Qurylys jumystary bıyl bastaldy, qazirgi tańda metall konstrýktsııalaryn ornatý jumystarynyń 70%-y aıaqtalyp, qajetti jabdyqtar men materıaldardyń jetkizýshileri anyqtalǵan.

Bolashaq et kombınaty táýligine 70 bas iri qara jáne 700 bas usaq maldy soıýǵa arnalǵan zamanaýı jelilermen jabdyqtalady. Sonymen qatar táýligine 17 tonna ónim óndiretin shujyq jáne konservi tsehtary jumys isteıtin bolady. Jalpy óndiristik qýaty jylyna 11,4 myń tonna daıyn ónimdi qamtıdy. Nysandy paıdalanýǵa berý kelesi jyldyń tamyz aıyna josparlanyp otyr.

Sapar barysynda mınıstr «Prırechnoe» agrofırmasyna da bardy. Bul sharýashylyq asyl tuqymdy mal jáne ósimdik sharýashylyqtarymen aınalysady. Munda 2 900 bas iri qara, 248 bas jylqy bar, sondaı-aq 1 860 gektar sýarmaly jer paıdalanylady.

Kásiporyn bazasynda 14 myń tonna ónim saqtaıtyn kókónis qoımasy jumys isteıdi. 2025–2026 jyldary ınvestıtsııa kólemi 4 mlrd teńge bolatyn 10 myń basqa arnalǵan bordaqylaý alańynyń qurylysy josparlanǵan.

Agrofırma asyl tuqymdy mal zaýyty jáne 1–3 reprodýktsııaly kartop tuqymyn óndiretin sharýashylyq mártebesine ıe. Munda Valley, Zimmatic jáne Reinke markaly 28 sýarý júıesi ornatylǵan.

Kókónis alqaptaryn aralaý kezinde mınıstr óndiristiń uıymdastyrýshylyǵy joǵary ekenin jáne sý resýrstaryn tıimdi paıdalanyp otyrǵanyn atap ótti.

«Memleket basshysynyń aıryqsha nazarynyń, Úkimettiń júıeli qoldaýynyń jáne aýqymdy ınvestıtsııalardyń arqasynda sońǵy eki jylda agrarlyq sala shynaıy damý kezeńine kóterildi. Aýyl sharýashylyǵynda 35 jyldan beri eńbek etip kelemin, mundaı keshendi qoldaýdy alǵash ret kórip otyrmyn», — dedi agrofırmanyń bas dırektory Muhıt Tumabaev.

Júzdesý sońynda Aıdarbek Saparov Abaı oblysynda júzege asyrylyp jatqan jobalardyń eldiń aýyl sharýashylyǵyn damytý úshin strategııalyq mańyzy bar ekenine toqtaldy.

«Óńirdiń mal sharýashylyǵy men qaıta óńdeý salasynyń áleýeti zor. Bul jobalar – jaı ǵana ınvestıtsııalar emes, bul aýyldyń damýyn, halyqtyń jumyspen qamtylýyn jáne otandyq ónimniń básekege qabilettiligin arttyrýǵa baǵyttalǵan jańa ındýstrııalyq baza. Mınıstrlik aldaǵy ýaqytta da fermerlerdi qoldaýdy, birlesken is-qımyldy jáne zamanaýı tehnologııalardy engizýdi jalǵastyratyn bolady », — dedi mınıstr.

Osyǵan deıin Aýyl sharýashylyǵy jerleriniń tsıfrlyq kartasy ázirlenip jatqany týraly jazdyq.