Aldaǵy jyldary taýar eksporty qanshalyqty artady
ASTANA. KAZINFORM — Aldaǵy jyly Qazaqstanda oń saýda balansy saqtalady. Bul týraly Quryltaıda 2027–2029 jyldarǵa arnalǵan áleýmettik-ekonomıkalyq damý boljamyn tanystyrý kezinde Ulttyq ekonomıka birinshi vıtse-mınıstri Azamat Ámrın aıtty.
- Taýarlar eksporty boljam boıynsha 2027 jyly 82,8 mlrd AQSh dollarynan 2029 jyly 88,5 mlrd AQSh dollaryna deıin, ımport – 80,5-ten 88,4 mlrd AQSh dollaryna deıin ósedi. Inflıatsııanyń boljamdy dálizi 2027 jyly 7,5-9,5 paıyz, 2028-2029 jyldary 6-8 paıyz deńgeıinde anyqtalǵan, - dedi A. Ámrın.
Sonymen qatar ol makroekonomıkalyq kórsetkishterdiń boljamy negizinde 2027–2029 jyldarǵa arnalǵan bıýdjet pen Ulttyq qor parametrleriniń boljamy qalyptastyrylǵanyn aıtty. Bıýdjetti boljaý 2030 jylǵa deıingi memlekettik qarjyny basqarý tujyrymdamasynda belgilengen bıýdjet qaǵıdalary men nysanaly baǵdarlarǵa negizdeldi.
- Respýblıkalyq bıýdjet kiristeriniń boljamyn esepteý kezinde ótken jylǵy naqty atqarylýy jáne osy jyldyń 7 aıynyń qorytyndysy boıynsha baǵalaý baza retinde alyndy. Kirister 2027 jyly 19,9 trln teńge kóleminde nemese jalpy ishki ónimge qatysty 10 paıyz deńgeıinde boljanýda. Osy jylǵy baǵalaýmen salystyrǵanda 2,8 trln teńgege ósedi. Kiristerdiń negizgi ulǵaıýy myna faktorlar esebinen boljandy: ekonomıkanyń ósýi 1,6 trln teńge shamasynda, qosalqy qun salyǵyn qaıtarý somalarynyń tómendeýi 1,1 trln teńge, sondaı-aq basqa da faktorlar 0,5 trln teńge deńgeıinde bolady, - dedi vıtse-mınıstr.
Buǵan deıin habarlanǵandaı, búgin Quryltaıda 2027-2029 jyldarǵa arnalǵan respýblıkalyq bıýdjet jobasy tanystyryldy.
