Aldaǵy jyldary stýdentterge arnalǵan bilim baǵytynyń 40 paıyzyn jańartý qajet
ASTANA. KAZINFORM — Álemdegi jumys oryndarynyń 40 paıyzy JI-diń áserine ushyrady. Bul týraly Parlament Májilisinde joǵary bilimdi kadrlardy daıarlaý taqyrybyna arnalǵan Úkimet saǵatynda depýtat Ashat Aımaǵambetov málim etti.
— 2022 jyldyń qarashasynda ChatGPT shyqty. Nebári eki-aq aı ishinde 100 mıllıon qoldanýshy jınady. Sol sátten bastap burynǵy «zamanaýı» dep eseptelgen dúnıeler jetkiliksiz bolyp qaldy. Biz bilim berý júıesin ondaǵan jyldar boıy damyttyq. Ol logıkalyq turǵydan durys boldy, tıimdi jumys istedi. Biraq jasandy ıntellekt bárin ózgertti. Osyǵan deıin bilim logıkasy túsinikti edi. Mamandyq boıynsha neǵurlym beıindi bilim berseń, soǵurlym jaqsy kórinetin. Zańger — quqyqty, aýdarmashy — tildi, esepshi — shottardy bilýi tıis edi. Bul júıe tıimdi boldy. Al JI paıda bolǵannan keıin bul logıka jetkiliksiz bolyp qaldy. Sebebi dál osyndaı tapsyrmalardy JI ortasha mamanǵa qaraǵanda tezirek, dálirek jáne tıimdi oryndaıdy. Sondyqtan bizdiń búgingi mindetimiz — kelesi suraqtarǵa ashyq jaýap berý. Biz bes jyldan keıin suranysqa ıe bolatyn mamandardy daıyndap jatyrmyz ba? Álde eskirgen ekonomıka úshin mamandar shyǵyp jatyr ma? , — dedi Ashat Aımaǵambetov.
Osy oraıda ol jasandy ıntellekt eńbek naryǵyn túbegeıli ózgertip jatqanyn eske saldy. Naryqtyń ózgerý jyldamdyǵy bilim berý júıemizdiń reaktsııasynan áldeqaıda joǵary.
— Halyqaralyq valıýta qorynyń (HVQ) baǵalaýynsha, álemdegi jumys oryndarynyń 40%-y qazirdiń ózinde JI-diń áserine ushyrap otyr. Eń qyzyǵy, tarıhta alǵash ret soqqy zaýyttaǵy jumysshylarǵa emes, biz «ofıs elıtasy» dep júrgen mamandarǵa tıdi: zańgerler, taldaýshylar, aýdarmashylar, býhgalterler men qarjygerler birinshi kezekte tur. Mıllıondaǵan jańa mamandyq paıda bolady, biraq dál sondaı mıllıondaǵan qazirgi jumys orny jaı ǵana joıylyp ketedi. Biz úshin eń qaýiptisi — búgin stýdentterge aýdıtorııada úıretip jatqan daǵdylardyń 40%-y 2030 jylǵa qaraı jańartýdy qajet etedi, ıaǵnı nebári tórt jyldan keıin. Bul — erteńgi emes, búgingi shyndyq. IBM men Microsoft sııaqty alpaýyttar qazirdiń ózinde myńdaǵan qyzmetkerin qysqartyp jatyr, — dedi depýtat.
Budan buryn habarlanǵandaı, 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgerýi múmkin.
