Aldaǵy jyldary Ekibastuzdaǵy jylý berý júıesi tolyq jańarady – óńir ákimi

ASTANA. KAZINFORM – Pavlodar men Ekibastuz, Aqsý qalalaryn sýmen jáne jylý berý júıesimen qamtamasyz etýde másele joq. Bul týraly Jibek Joly telearnasynyń «Ýáde» baǵdarlamasynda Pavlodar oblysynyń ákimi Asaıyn Baıhanov málim etti.

– Ekibastuz qalasyna toqtalsaq, 400 shaqyrymǵa jýyq jylý berý jelisi bar. Jalpy, onyń 100 shaqyrymǵa jýyǵy aýystyryldy. Degenmen, qalǵan 300 shaqyrymy eskirgen. Jospar aıasynda jyl saıyn osy jelilerdi jańartý aýqymyn kóbeıtemiz. Bul turǵyda 2028 jyly tolyqtaı aýystyrylmaq, - dedi A. Baıhanov.

Osy oraıda ol qazir qalada jylý berý boıynsha másele joq ekenin, ıaǵnı barlyq turǵyn úıler qamtylǵanyn aıtty.

– Muny eskere otyryp, qala turǵyndary osy qystaǵy jylý berý mýsymyn eshbir problemasyz ótedi dep oılaımyn, - dedi óńir ákimi.

Sonymen qatar Asaıyn Baıhanov 2022 jyly qarashada Ekibastuz qalasyndaǵy jylý berý júıesindegi apatqa qatysty pikir bildirdi.

– Bul apat boıynsha kináli adamdar anyqtaldy, tehnıkalyq kemshilikter joıyldy. Osy apattyń saldarynan zardap shekkenderge kómek berildi. Bul oqıǵadan keıin óńirdegi qalalardyń jylý júıesine keshendi taldaý jasaldy, - dedi ol.

Aıta keteıik, 2022 jyly 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy. 

Eske salsaq, bıyl qyrkúıek aıynda Ekibastuzdaǵy jylý ortalyǵy daıyndyq pasportyn alýǵa ótinim bergenin jazǵan edik. 

Budan buryn habarlanǵandaı, 2023 jyly Premer-Mınıstrdiń birinshi orynbasary Roman Sklıar Ekibastuzda qazandyqtardyń isten shyǵýy jıilep ketkenin aıtty.