Aldaǵy jyldary baspana baǵasy tómendemeıdi – Lázzat Ibragımova
ASTANA. KAZINFORM – Qazaqstanda joǵary suranysqa baılanysty aldaǵy jyldary baspana baǵasynyń tómendeýi kútilmeıdi. Bul týraly Otbasy banktiń basqarma tóraıymy Lázzat Ibragımova Úkimettegi brıfıngide aıtty.
Onyń aıtýynsha, 2000-jyldardyń basynda elde týý kórsetkishi aıtarlyqtaı ósken. Eger 2000 jyly 222 myń bala dúnıege kelse, 2007 jyly bul kórsetkish 321,9 myńǵa jetken. Jeti jylda jyl saıynǵy ósim shamamen 15 myń bala bolǵan.
— Qazir sol jastar eńbek naryǵyna shyǵyp jatyr. 2000 jyly týǵandardyń jasy qazir 26-27-de. Sáıkesinshe, olar baspana naryǵynda óte joǵary suranys qalyptastyryp otyr. Ótken jyly biz 2,5 mln sharshy metr turǵyn úı saldyq — bul 150 myńnan astam páter. Soǵan qaramastan, satylym júrip jatyr: turǵyn úı qurylys jınaq júıesi arqyly da, kommertsııalyq ıpoteka arqyly da, halyqqa tikeleı satý arqyly da, — dedi Lázzat Ibragımova.
Suranystyń ósýine neke sanynyń artýy da áser etip otyr. Bank basshysynyń aıtýynsha, elde jyl saıyn shamamen 120-130 myń neke tirkeledi.
— Elestetip kórińizder, jańa otbasy qurylǵanda eń birinshi jospar — páter satyp alý. Sondyqtan 2000-2009 jyldary bolǵan demografııalyq úrdis, ıaǵnı beıbı-bým 2026-2027 jyldary turǵyn úı suranysyna óte qatty áser etedi, — dedi ol.
Sonymen birge L.Ibragımovanyń aıtýynsha, turǵyn úı baǵasynyń kúrt qymbattaýy da ekitalaı.
— Birinshiden, baǵanyń tómendeýi bolmaıdy, muny naqty aıta alamyn. Ekinshiden, qaıtalama naryqta túrli faktorlar áser etýi múmkin, bálkim belgili bir toqyraý bolýy yqtımal. Al jańa turǵyn úıler naryǵynda kóp nárse shıkizat pen qurylys materıaldarynyń baǵasyna, sondaı-aq qurylysta jumys isteıtin adamdardyń jalaqysyna baılanysty bolady. Biraq demografııaǵa jáne qazirgi kórsetkishterge qarap, baǵanyń tómendeýi ekitalaı, — dedi bank basshysy.
Buǵan deıin Lázzat Ibragımova zeınetaqy jınaǵyn emge paıdalaný múmkindigi qaıta enýi múmkin ekenin aıtqan edi.
Sondaı-aq Premer-Mınıstr Oljas Bektenov memlekettik baǵdarlamalarǵa júktemeni azaıtý úshin qoljetimdi kommertsııalyq ıpotekany damytyp, kólemin ulǵaıtýdy tapsyrdy.