Aldaǵy jarysta qazaqstandyqtardyń qoldaýy biz úshin óte mańyzdy – Elena Rybakına

ASTANA. KAZINFORM — Qazaqstannyń birinshi, álemniń 10-raketkasy Elena Rybakına Aýstralııanyń Brısben qalasynda erteń bastalatyn Bıllı Djın Kıng kýbogynyń irikteý týrnıri qarsańynda suhbat berdi.

- Elena, Qazaqstan namysyn qorǵaýǵa taǵy da bekinip otyrsyń. Qandaı kóńil-kúıdesiń?

- Kóp rahmet. Brısben – men úshin erekshe qala. Ótken jyly osyndaǵy týrnırde jeńimpaz atandym. Árıne, maýsym ortasynda Aýstralııaǵa kelý qolaıly emes. Óıtkeni Eýropada topyraq tósenishindegi jarystar bastaldy, al munda hardta júrmiz. Degenmen ulttyq qurama sapynda oınaý men úshin abyroı, jaqsy óner órnegin kórsetýge tyrysamyz. 

- Jekeleı synda kortqa shyqqan jaǵdaıda bul sen úshin Qazaqstan quramasyndaǵy onynshy kezdesý bolmaq. Bul meje qanshalyqty mańyzdy?

- Shynymdy aıtsam, muny bilmeppin. Biraq, árıne, bul kórsetkish unaıdy. Men Qazaqstan sapynda halyqaralyq arenada únemi óner kórsetýge beıildimin. Bizdiń kestemiz ońaı emes, alaıda qurama úshin oınaýǵa múmkindik týǵan kezde ony múlt jibermeýge tyrysamyn. El namysyn qorǵaý – qashanda qurmet. 

- Qazaqstan quramasy erteń Aýstralııamen, bir kúnnen keıin Kolýmbııamen kezdesedi. Komandanyń múmkindigi qandaı dep oılaısyń?

- Bizde jeńiske jetý úshin tolyq múmkindik bar. Dodaǵa jaqsy daıyndaldyq. Ózimizge senemiz. 

- Match aldynda jankúıerlerge ne aıtar ediń?

- Bizdi qoldańyzdar! Sizderdiń qoldaýyńyz óte mańyzdy. Biz óz tarapymyzdan sizderdi qýantyp, jeńiske jetý úshin qoldan kelgenniń bárin jasaımyz. 

- Áńgimeńe rahmet! Sáttilik tileımiz.

Eske sala keteıik, budan buryn Rybakınanyń Qazaqstan namysyn qorǵaý úshin ózi chempıon bolǵan jarysqa qatyspaıtynyn jazǵan edik.

Bıyl Shtýtgart (Germanııa) WTA 500 týrnıri 14-21 sáýir aralyǵynda ótedi. 2024 jyly E.Rybakına osynda chempıon atanǵan edi. 

Qazaqstandyq tennısshi osy kezde Brısbende el namysyn qorǵaıtyndyqtan, atalmysh dodadan tys qalyp, 500 reıtıngilik upaıynan aıyrylady.