Aldaǵy vegetatsııa maýsymynda elimizdiń ońtústik óńirlerinde sý jetispeýi múmkin
ASTANA. KAZINFORM — Aldaǵy vegetatsııa maýsymynda elimizdiń ońtústik óńirlerinde sý jetispeýi múmkin. Bul týraly Sý resýrstary jáne ırrıgatsııa mınıstrligi Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov aıtty.
— Qazirgi ýaqytta ońtústik óńirdiń sý qoımalary jınaqtaý rejıminde jumys istep jatyr. Sonymen birge, Premer-mınıstrdiń orynbasary Qanat Bozymbaevtyń tóraǵalyǵymen Jambyl, Qyzylorda jáne Túrkistan oblystarynda aldaǵy vegetatsııa kezeńine daıyndyq máseleleri boıynsha keńes ótti. Sharýalar men jergilikti atqarýshy organdarǵa kelesi jylǵa boljanyp otyrǵan sý kólemi jáne sý resýrstarynyń azaıýy áserin jeńildetý sharalary týraly túsindirildi, - dedi ol Ortalyq kommýnıkatsııalar qyzmetindegi brıfıngide.
Osy rette komıtet basshysy Qazaqstannyń jáne Ortalyq Azııa elderindegi mamandardyń boljamdary boıynsha aldaǵy vegetatsııa maýsymynda sý resýrstarynyń kólemi keıingi jyldarmen salystyrǵanda azaıýy múmkin.
— Osyǵan baılanysty Qazaqstannyń ońtústik óńirlerinde sý jetispeýshiligi táýekeli bar. Qyzylorda oblysynda aýyl sharýashylyǵy daqyldaryn ártaraptandyrý baǵytynda arnaıy jumys toby qurylady. Sý resýrstary jáne ırrıgatsııa mınıstrligi, Aýyl sharýashylyǵy mınıstrligi jáne jergilikti atqarýshy organ mamandary aldaǵy maýsymda boljamdy sý kólemine qaraı ylǵaldy kóp qajet etetin daqyldardyń egis alqaptaryn aıqyndaý boıynsha jumystar kózdelgen, - dedi Seıilbek Nurymbetov.
Buǵan deıin 2026 jyly 109 shaqyrym ózen arnasy kúsheıtiletinin jazǵan edik.