Aldaǵy úsh jylda sý únemdeý tehnologııasyn engizýdi sýbsıdııalaýǵa 214 mlrd teńge bólinedi
ASTANA. KAZINFORM – Sý únemdeý tehnologııalaryn engizýdi yntalandyrý maqsatynda memlekettik qoldaý tetikteri qaıta qaraldy: uńǵyma burǵylaý jáne sý únemdeıtin jabdyq satyp alýǵa jumsalǵan shyǵyndardyń ótemaqy úlesi 50%-dan 80%-ǵa deıin artty.
Bul týraly Sý resýrstary jáne ırrıgatsııa mınıstri Nurjan Nurjigitov aıtty. Sýdy sýbsıdııalaý dıfferentsııalanyp, onyń mólsheri tikeleı sý únemdeý júıelerin qoldanýǵa baılanysty belgilengen.
Osy maqsattarǵa qol jetkizý úshin 2026-2028 jyldarǵa arnalǵan respýblıkalyq bıýdjetten ınvestıtsııalyq sýbsıdııalarǵa 214 mlrd teńgeden astam, al sýarý sýynyń qunyn sýbsıdııalaýǵa 13,5 mlrd teńge kóleminde transfertter qarastyrylǵan.
«Jalpy alǵanda, memleket qoldaý kórsetip otyrǵan sý salasyna keshendi kózqaras aýyl sharýashylyǵy sektoryn turaqty damytýǵa jáne senimdi sý qamtamasyz etýge múmkindik beredi dep senemiz. Bul – ulttyq qaýipsizdik pen azamattardyń ál-aýqatynyń mańyzdy quramdas bóligi. Al jergilikti atqarýshy organdardan barlyq qatysýshynyń jumysyn naqty úılestirý, is-sharalardy ýaqytyly oryndaý, bólingen qarajatty tıimdi jáne maqsatty paıdalaný, sondaı-aq jumystardyń sapasyn turaqty baqylaý talap etiledi. Tek jergilikti deńgeıde jaýapkershilikpen jumys atqarǵanda ǵana biz qoıylǵan maqsattarǵa jete alamyz», – dedi Sý resýrstary jáne ırrıgatsııa mınıstri Nurjan Nurjigitov.
Keıin mınıstrlik ókilderi aýyl ákimderiniń suraqtaryna jaýap berdi. Sý sharýashylyǵy vedomstvosynyń basshysyna aýyl turǵyndaryn sýarý sýymen qamtamasyz etý, sý únemdeý tehnologııalaryn engizýdi sýbsıdııalaý jáne pılottyq jobalardy iske asyrý, kanaldar men kollektorlardy rekonstrýktsııalaý, jańa sý qoımalaryn salý, aýyl sharýashylyǵy men ekinshi sektordaǵy jeke sharýashylyqtardy sýmen qamtamasyz etý máselelerine qatysty suraqtar qoıyldy.
Aıta keteıik, sý únemdeý tehnologııalary paıdalanylatyn egis alqabynyń aýmaǵy 86%-ǵa ulǵaıdy.