Aldaǵy úsh jylda elde avtokólik bólshekterin shyǵaratyn nysandar ashylady

ASTANA. KAZINFORM – Aldaǵy jyldary avtokólik bólshekterin shyǵaratyn kásiporyndar ashylady. Bul týraly Úkimet otyrysynda QR Ónerkásip jáne qurylys mınıstri Ersaıyn Naǵaspaev málim etti.

- Byltyr avtomobıl óndirisi rekordtyq ósim kórsetip, mashına jasaý sektorynyń 41,7 paıyzyn qurady. Barlyǵy 171 myńnan astam kólik túrleri shyǵaryldy. Onyń ishinde 159 myńy jeńil avtomobıl. Almaty qalasynda «Chery», «Haval», «Changan» brendterin shyǵaratyn mýltıbrendtik zaýyt pen Qostanaı qalasynda «Kia Qazaqstan» zaýyty sııaqty eki jańa joǵary tehnologııalyq óndiris iske qosyldy. Osyndaı zaýyttardyń iske qosylýy avtokomponentter óndirisin lokalızatsııalaýǵa serpin berip otyr. Mysaly, byltyr Almaty ındýstrııalyq aımaǵynda avtokomponentter tehnoparki iske qosyldy. Onda avtokólikterge arnalǵan mýltımedıa júıeleri men oryndyqtar óndiriledi, - dedi E. Naǵaspaev.

Onyń aıtýynsha, Saran qalasynda «Tengri Tyres» zaýytynda avtomobıl shınalary shyǵarylyp jatyr. Qostanaıdaǵy «KamLitKZ» zaýytynda shoıyn quıatyn zamanaýı tehnologııalar men avtomattandyrylǵan júıelerdi paıdalanatyn shoıyn quıý óndirisi iske qosyldy.

Sonymen qatar, «Allur» kompanııasy avtokomponentter óndirisin lokalızatsııalaý ortalyǵynyń qurylysyna kiristi. Odan bólek aldaǵy úsh jylda jylytý jáne kondıtsıonerleý júıeleri, tejegish, salon men edenge arnalǵan plastıkalyq bólshekter sııaqty avtokomponentterdi lokalızatsııalaý boıynsha jańa jobalardy iske qosý josparlanǵan. 

Budan buryn habarlanǵandaı, Ónerkásip mınıstri Qarmet-tegi ózgeristerge túsinik berdi.