Aldaǵy úsh kúnge aýa raıy boljamy: ońtústik óńirlerde +40°S-qa deıin kún ysıdy
ASTANA. KAZINFORM – «Qazgıdromet» RMK 11-13 maýsym aralyǵynda elimizde kún raıy qandaı bolatyny jóninde málimet jarııalady. Qazaqstannyń soltústik-batysynda aýa raıy buzylsa, al ońtústikte, kerisinshe, shilińgir ystyq bolady.
– Batys tsıklony Qazaqstan aýmaǵynyń basym bóligindegi aýa raıyna áli de áserin saqtap, turaqsyz aýa raıyn qalyptastyrady. Tsıklonnyń ortalyǵy elimizdiń soltústik-batysynda bolady. Osyǵan baılanysty munda jańbyr jaýyp, naızaǵaı oınaıdy. Jel kúsheıip, daýylǵa aınalýy jáne burshaq jaýýy múmkin, - delingen habarlamada.
Mekeme málimetinshe, 11-13 maýsym kúnderi Qostanaı jáne Aqtóbe oblystarynda, al 11 maýsymda Almaty oblysy men Jetisý oblysynyń taýly jáne taý bókterindegi aýdandarynda shelektep jańbyr jaýady.
Kúndiz elimizdiń ońtústiginde aýa temperatýrasy +35°S-tan +40°S-qa deıin, ońtústik-shyǵysynda +30°S -tan +37°S-qa deıin kóterilip, aptap ystyq bolady.
Al basqa aımaqtarda aýa temperatýrasy bir qalypty saqtalyp, aıtarlyqtaı ózgeris boljanyp otyrǵan joq.
Aıta keteıik, buǵan deıin Óskemen men Semeı qalalarynda aýa sapasy nasharlaıtynyn jazǵanbyz.
