Aldaǵy úsh kúnde soltústikte salqyndap, ońtústikte +40 gradýsqa deıin ystyq bolady
ASTANA. KAZINFORM — «Qazgıdromet» RMQ Qazaqstan boıynsha 23–25 maýsymǵa arnalǵan aýa raıy boljamyn jarııalady.
Sınoptıkterdiń boljamynsha, aptap ystyqtan keıin elimizdiń soltústik óńirleriniń turǵyndaryn azdap salqyndaý kútip tur. Qazaqstan aýmaǵyna tsıklon yǵysyp kelip, jańbyr, naızaǵaı, burshaq, jeldiń ekpindi kúsheıýi jáne shańdy daýyldar ákeledi.
Alaıda osydan keıin kópten kútken salqyn aýa raıy ornaıdy: elimizdiń soltústik jáne ortalyq óńirlerinde aýa temperatýrasy qolaıly +23…+28 gradýs shamasynda bolady.
— Degenmen, barlyq óńirlerde ystyqtyń beti qaıtpaıdy. Qazaqstannyń ońtústik jáne shyǵys aımaqtaryna Ózbekstan aýmaǵynan qurǵaq ári jyly aýa massalarynyń kelýi jalǵasady. Sonyń áserinen bul óńirlerde aýa temperatýrasy +33…+38 gradýsqa deıin saqtalyp, jekelegen aýdandarda óte qatty ystyq +40 gradýsqa deıin jetedi, — delingen habarlamada.
Aıta keteıik, 22 maýsymda Qazgıdromet eldiń 17 oblysy men Astana qalasynda daýyldy eskertý jarııalady.
