Aldaǵy úsh kúnde el aýmaǵynda tsıklon áserinen aýa raıy turaqsyz bolady
ASTANA.KAZINFORM — «Qazgıdromet» RMQ 25–27 maýsymǵa arnalǵan Qazaqstan boıynsha aýa raıy boljamyn jarııalady.
— Respýblıka aýmaǵyndaǵy aýa raıyn soltústik-batys tsıklony jáne onymen baılanysty atmosferalyq frontaldy bólikter aıqyndaıtyn bolady. Osyǵan baılanysty jańbyr jaýyp, naızaǵaı oınaıdy, burshaq túsýi, jeldiń ekpindi kúsheıýi jáne shańdy daýyldar kútiledi, — delingen habarlamada.
25 maýsymda elimizdiń soltústik-batysynda jáne soltústiginde, 25–26 maýsymda shyǵysynda, 26–27 maýsymda batysy men soltústik-batysynda qatty jańbyr boljanady.
Soltústik-batys, soltústik jáne ortalyq óńirlerde aptap ystyqtyń báseńdeýi kútiledi, kúndizgi aýa temperatýrasy +23…+28°S-qa deıin tómendeıdi.
Alaıda Qazaqstannyń ońtústik jáne shyǵys óńirlerine Ashhabad mańynan qurǵaq ári jyly aýa massalarynyń kelýi jalǵasady. Sonyń áserinen bul óńirlerde aýa temperatýrasy +33…+38°S shamasynda saqtalyp, jekelegen aýdandarda óte qatty ystyq +40…+42°S-qa deıin jetedi.
Búgin Qazaqstannyń birqatar óńirinde aptap ystyq saqtalady.
