Aldaǵy úsh kúnde aýa raıy qandaı bolady

ASTANA. KAZINFORM — «Qazgıdromet» RMQ 25-27 qyrkúıekke arnalǵan aýa raıy boljamyn jarııalady.  

Sınoptıkterdiń málimetinshe, aldaǵy kúnderi atmosferalyq frontaldy bólikter elimizdiń basym bóliginde aýa raıynyń turaqsyz sıpatyn saqtaıdy – jańbyr, naızaǵaı kútiledi. 26 qyrkúıekte batysta, soltústik-batysta, 27 qyrkúıekte soltústikte, soltústik-batysta qatty jańbyr, burshaq, daýyldyq jel boljanady. Respýblıka boıynsha jeldiń kúsheıýi kútiledi, shyǵysta jáne ońtústik-shyǵysta túngi jáne tańǵy saǵattarda tuman túsedi.

Aýa temperatýrasy:

• Batys óńirde túnde 12–17-den 2–7 jylylyqqa deıin tómendeıdi, batys pen soltústikte 2 gradýsqa deıin úsik kútiledi, kúndiz 20–28-den 10–23 jylylyqqa deıin.

• Soltústik-batysta túnde 7–15-ten 3–11 jylylyqqa deıin, kúndiz 23–29-dan 10–18 jylylyqqa deıin.

• Soltústikte túnde 10–16-dan 5–13 jylylyqqa deıin, kúndiz 20–28-den 12–25 jylylyqqa deıin.

• Ortalyqta túnde 5–13 jylylyq, kúndiz 20–25 jylylyq.

• Shyǵysta túnde 0–8-den 7–15 jylylyqqa deıin joǵarylaıdy, soltústik pen shyǵysta 2 gradýsqa deıin úsik kútiledi, kúndiz 15–25-ten 20–28 jylylyqqa deıin.

• Ońtústikte túnde 5–15, kúndiz 25–30 jylylyq.

• Ońtústik-shyǵysta túnde 5–13-ten 7–15 jylylyqqa deıin joǵarylaıdy, kúndiz 15–27-den 22–30 jylylyqqa deıin.

Aıta keteıik, Ekologııa jáne tabıǵı resýrstar vıtse-mınıstri Nurken Shárbıev Úkimette egin jınaıtyn aımaqtardaǵy aýa raıy boljamyn baıandap, egin jınaýǵa qolaısyz aýa raıy bolatynyn aıtqan edi.