Aldaǵy úsh kúnde 42 gradýsqa deıin ystyq bolady - Qazgıdromet

ASTANA. KAZINFORM – «Qazgıdromet» RMK-sy shildeniń 12-14 aralyǵyndaǵy kún raıy boljamyn jarııalady.

Kásiporynnyń derekterine qaraǵanda, atmosferalyq frontaldy bólikterdiń ótýine baılanysty Qazaqstan aýmaǵynyń basym bóliginde jańbyr jaýyp, naızaǵaı oınaıdy, soltústik pen shyǵysta nóser jańbyr jáne burshaq jaýady, kúshte jel turýy yqtımal. Tek eldiń ońtústiginde, ońtústik-batysynda, sondaı-aq 12 shildede batysynda joǵary qysym alabynyń yqpalymen kún ashyq ári ystyq bolady. Respýblıkanyń basym bóliginde jel kúsheıedi.

Kúndiz elimizdiń batysynda 35–39°S ystyq, keı aýdandarda ystyq 40–42°S deıin jetedi. 12–13 shildede ońtústik-batysta ystyq 39–44°S bolady, al 14 shildede 38–42°S ystyq.

Soltústik óńirlerde kúndizgi aýa temperatýrasy 17–25°S-tan 15–23°S-qa deıin sál tómendeıdi. Shyǵysta temperatýra negizinen 22–30°S shamasynda bolady. Ońtústikte 40–43°S aptap ystyq, al ońtústik-shyǵysta 35–38°S qatty ystyq boljanady.

Osyǵan deıin Pákistanda tótenshe aýa raıy saldarynan qaza tapqandar sany artqany týraly jazdyq.