Aldaǵy ýaqytta Qazaqstan qandaı jańa spýtnıkterdi ushyrady
ASTANA. KAZINFORM – QR Tsıfrlyq damý, ınnovatsııalar jáne aeroǵarysh ónerkásibi mınıstrligi Qazaqstan qandaı jańa jer serikterin ushyrýdy josparlap otyrǵanyn málimdedi.
«Qazaqstannyń «GHALAM» JShS kompanııasy 2023 jyldan bastap Ǵarysh apparattaryn qurastyrý-synaý kesheni bazasynda «KazEOSat-MR» jerdi qashyqtan zondtaýdyń úsh jer seriginen turatyn toptamany qurý boıynsha jumystardy atqaryp jatyr. Olardy ushyrý 2026 jylǵa josparlanǵan», - delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, 2029 jylǵa qaraı «KazSat-3» baılanys spýtnıgin jańasyna aýystyrý qarastyrylǵan. Jańa apparat suranysty qanaǵattandyrýda jáne eldiń aqparattyq qaýipsizdigin qamtamasyz etýde zamanaýı tehnıkalyq sheshimderdi qoldanýǵa arnalǵan. Bul baǵytta sheteldik ǵarysh tehnıkasyn óndirýshilerden aldyn ala tehnıkalyq-kommertsııalyq usynystar alyndy. Osy rette jobaǵa qoıylatyn talaptardy qalyptastyrý jáne ony qarjylandyrýdy qamtamasyz etý boıynsha jumystar bastaldy
Esterińizge sala keteıik, 2014 jylǵy 28 sáýirde «KazSat-3» úshinshi ulttyq geostatsıonarlyq habar taratý jáne baılanys spýtnıgi sátti ushyryldy. «KazSat-3» spýtnıginde Qazaqstan aýmaǵyn baılanys qyzmetimen qamtamasyz ete alatyn Ku-dıapazondy 28 transponder ornatylǵan. Ǵarysh apparatynyń jumys isteý merzimi - 15 jyl.
Qazaqstan men Ózbekstan birlesip ǵaryshqa spýtnık ushyrýdy josparlap otyr.
