Aldaǵy ýaqytta qazaq tilinde án jazǵym keledi – Mustafa Óztúriktiń qyzy

ASTANA. KAZINFORM – 14-16 tamyz kúnderi elordada taekvondodan G-1 sanatyndaǵy Kazakhstan Open halyqaralyq týrnıri ótedi. Osy dodaǵa qurmetti qonaq retinde taekvondodan 6 dúrkin álem chempıony, 6-dan ıegeri, Qazaqstanda taekvondo federatsııasynyń negizin qalaǵan Mustafa Óztúriktiń qyzy Neslıhan Óztúrik shaqyrylǵan bolatyn. Kazinform agenttiginiń analıtıkalyq sholýshysy osy sátti paıdalanyp dańqty tulǵanyń qyzymen áńgimelesti.

Neslıhan Óztúrik qazir otbasymen Germanııanyń Mıýnhen qalasynda turady. Ákesi Mustafa Óztúrikke qatysty kóptegen estelik te sol shaharmen baılanysty eken.

– Biz otbasymyzda 3 bala boldyq, aǵam, men jáne sińilim. Úsheýmiz de Germanııanyń Mıýnhen qalasynda týyp-óstik, qazir sol jaqta turyp jatyrmyz. Ákemiz biz úshin óte jyly adam boldy. Kóp súıetin, qatty jaqsy kóretin. Balalar oınaıtyn alańǵa jıi aparatyn. Ol kisi ómirde kóp ázildesetin, janyndaǵylardy ylǵı kúldirip júretin, – dep bastady áńgimesin Neslıhan Óztúrik.

Onyń aıtýynsha, Mustafa Óztúrik óz balalaryna da taekvondo boıynsha sabaq bergen. Sporttyq daıyndyqqa kelgende dańqty tulǵa balalaryn ózgelerden erekshelemeı, tym qatal talap qoıǵan.

– Mekteptegi sabaǵymyzdan shyqqan soń ákemiz taekvondo mektebine alyp ketetin. Ol jerde ózi dáris oqıtyn, shákirtterge taekvondonyń tásilderin úıretetin. Bizdi de taekvondaǵa mashyqtandyrdy. Daıyndyqtaǵy jekpe-jekterde «bylaı jappaısyń, osylaı etesiń» dep qatty urysatyn. ıAǵnı, jattyǵýda óte qatal boldy.

Shákirtterin kórsetip, «olar durys istep jatyr, sen de durys isteısiń! Qyz bolǵanyń mańyzdy emes, mineziń qatty qyz bolyp ósýiń kerek» dep aıtatyn. Biraq bir tásildi durys jasasaq birden kelip betimizden súıetin. Osylaısha janymyzǵa jaqyn ekenin bildiretin, – deıdi.

Neslıhan Óztúrik áńgimede Qazaqstanǵa qatysty estelikterin de ashyp aıtty. Astanaǵa birinshi ret kelip turǵan ol ózin atajurtpen baılanystyratyn jaıttar baryn jetkizdi.

– Men bala kezimde Qazaqstanǵa kelmegen sekildimin. 2014 jyly ákemniń 60 jyldyǵyna oraı Almatyda qonaq boldym. Ákemniń eskertkishi ashylǵan bolatyn. Mine, araǵa 11 jyl salyp atajurtqa ekinshi ret, al Astanaǵa birinshi ret kelip turmyn.

Biraz ýaqyt buryn úıden bir fotosýret taýyp alǵanym esimde. Sýrette apam, naǵashy apam, aǵam, ákem men anam bar eken. Sol kezde anamnan «men myna kezde qaıdamyn?» dep suraǵanymda «janymyzda, úıde boldyń» dep aıtty. «Bul qaı jer?» degenimde Qazaqstannyń bir óńirin ataǵan, biraq Astana nemese Almaty emes ekenin anyq bilemin. Anam «ushaqpen Qazaqstannyń kóp jerine bardyq» dep aıtty. Kishkentaı bala kezimdegi ol sátter esimde saqtalmaǵan eken, – dedi Mustafa Óztúriktiń qyzy.

Buǵan qosa Neslıhan Óztúrik kásibı túrde ánshilikpen aınalysady. Kóbine aǵylshyn jáne nemis tilderinde án shyrqaıdy. Áleýmettik jelilerde de belsendi. Endi aldaǵy maqsaty – qazaq tilinde án jazý.

– Kásibı túrde ánshilikpen aınalysamyn. Qazaq tilinde án aıtýdy qalaımyn. Degenmen áýeli qazaq tilin tolyq úırengim keledi, jazý men oqýdy meńgerýim qajet. Sodan soń qazaqsha ánder jaza alamyn dep oılaımyn. Qazir qazaqsha sóıleımin, degenmen deńgeıim asa jaqsy emes. Meniń Qazaqstanǵa kelip, qazaq tilinde suhbat berýim til úırenýime úlken tájirıbe bolady dep senemin, – dep túıindedi áńgimesin Neslıhan Óztúrik.