Aldaǵy ýaqytta e-Parlament suranysqa ıe quralǵa aınalýy múmkin - Prezıdent
ASTANA. KAZINFORM — Memleket basshysy aldaǵy ýaqytta e-Parlament suranysqa ıe quralǵa aınalýy múmkin ekenin jetkizdi.
«Úshinshiden, aldaǵy reforma ekonomıka, áleýmettik jáne tehnologııalyq damý sekildi basqa da salalardaǵy jan-jaqty jańǵyrýlarmen úılesim tabady. Mysaly, tsıfrlandyrý men jasandy ıntellektini engizý kúlli álemdegi memlekettik basqarý júıesin ózgertetini sózsiz.
Birqatar elde qazirdiń ózinde «elektrondyq» nemese tsıfrlyq parlament» elementteri synaqtan ótkizile bastady. Bul azamattardy saıası ómirge aralastyrýdyń jańa formalaryn qamtamasyz etip, zań shyǵarý úderisiniń tıimdiligin arttyrý maqsatynda jasalady.
Keleshekte bul úrdis kúsheıe túspek. Sondyqtan biz de osy baǵytqa sanaly túrde kúsh salamyz. Aldaǵy ýaqytta e-Parlament qazirgi elektrondyq úkimet – e-Gov sııaqty suranysqa ıe quralǵa aınalýy múmkin.
Sol sebepti bir palataly Parlamentke ótý bir esepten jumystyń jańa qalyby men qarqynyna, tez sheshim qabyldaýǵa beıimdelýdi kózdeıdi. ıAǵnı zaman ózgerip jatyr, ol óz talabyn oryndatady, e-Parlament júıesi qyr astynda tur. Jaqynda ómirimizge dendep enýi múmkin. Sondyqtan zań qabyldaýda múlde qate jiberýge bolmaıdy», - dedi Qasym-Jomart Toqaev.
Prezıdent bir palataly Parlamentte partııalardyń kóp bolýy saıası dıalogty kásibı negizde órbitýge yntalandyratynyn aıtty.
«Zań shyǵarý jumysyn jaqsartýdyń jańa tetikterin engizý atalǵan úderispen qatar júrýi qajet. Muny halyqaralyq tájirıbe de kórsetip otyr.
Bul rette bolashaq depýtattar korpýsynyń bilimi men biligi mańyzdy faktorǵa aınalady. Olardyń qatarynda naǵyz kásibı mamandar bolýy kerek. Parlament kásibı bolýǵa tıis. Bul – óte mańyzdy mindet. Parlamentti proportsııalyq júıemen, ıaǵnı partııalyq tizimmen jasaqtaý týraly usynys dál osy mindetten týyndap otyr. Bir palataly Parlamentte partııalardyń kóp bolýy saıası dıalogty kásibı negizde órbitýge yntalandyrady.
Jańa jaǵdaı partııa jumysyna tyń talaptar qoıady. Demek popýlızm tsıfrlandyrý kezeńinde mańyzdy ról oınamaıdy, kerisinshe, kásibıliktiń bási joǵarylaı túsedi», - dedi Memleket basshysy.
Aıta keteıik, Prezıdenttiń paıymynsha, Parlamentti reformalaý – Senatty taratý degen sóz emes.