Aldaǵy tórt jylda 2,7 trln teńgege 77,5 myń km elektr jelisi jańǵyrtylady

ASTANA. KAZINFORM – Elimizde 2029 jylǵa deıin 2,7 trln teńgege jalpy uzyndyǵy 77,5 myń km bolatyn elektr jelileri jańǵyrtylady. Bul týraly Elektr energetıkasyn damytý departamentiniń dırektory Asyljan Mýsın aıtty. 

— Ulttyq joba aıasynda 2,7 trln teńgege jalpy uzyndyǵy 77,5 myń km bolatyn elektr jelilerin jańǵyrtý kózdelgen. Kelip túsken ótinimderdi qaraý nátıjesinde mınıstrlik jalpy somasy 89,7 mlrd teńge bolatyn (onyń ishinde 2025 jylǵa – 46,7 mlrd teńge) 47 elektrmen jabdyqtaý jobasyn (1 000 km-den astam jelini jańǵyrtýǵa) qoldady, - dedi ol Power Central Asia + China óńirlik energetıkalyq forýmynda.

Sondaı-aq ol atalǵan 47 jobany iske asyrýǵa qajet negizgi materıaldar men jabdyqtardyń tizimi jasalǵanyn aıtty.

— Elektrmen jabdyqtaý salasy boıynsha qajettilik mynalardy quraıdy:

- Sym ónimderi (kabel, sym) – 4 447 km;

- Elektr berý jelisiniń komponentteri (tirekter, oqshaýlatqyshtar, baǵandar, qosqysh mýftalar, aspaptar) – 138 334 dana;

- Transformatorlar – 318 dana;

- KRÝ, KTPN, Qalqan – 286 jıyntyq;

- Shaǵyn stantsııa komponentteri – 2 122 dana, - dedi departament basshysy.

Aıta keteıik, 2029 jylǵa deıin qýaty 7,3 GVt bolatyn qosymsha generatsııa kózderi iske qosylady.