Aldaǵy referendým el bolashaǵy úshin tarıhı mańyzǵa ıe — Koalıtsııa
ASTANA. KAZINFORM — Astanadaǵy Prezıdenttik ortalyqta «Ádiletti jáne Progressıvti Qazaqstannyń Halyqtyq Konstıtýtsııasy úshin!» Jalpyulttyq koalıtsııasynyń qorytyndy otyrysy ótti. Іs-sharaǵa saıası partııalardyń ókilderi, qoǵamdyq uıymdar, Parlament depýtattary, sarapshylar jáne qoǵamdyq pikir kóshbasshylary qatysty. Respýblıkalyq referendým qarsańynda kezdesýge qatysýshylar túsindirý jumysyn qorytyndylady. Bul týraly Jalpyulttyq Koalıtsııanyń baspasóz qyzmeti málim etti.
Іs-sharada Parlament Májilisiniń Tóraǵasy Erlan Qoshanov, Memlekettik keńesshi Erlan Qarın, Premer-Mınıstrdiń orynbasary — Mádenıet jáne aqparat mınıstri Aıda Balaeva jáne ózge de azamattar sóz sóıledi.
Otyrysty ashqan Jalpyulttyq koalıtsııa jetekshisi Erlan Qoshanov Koalıtsııa músheleri elimizdegi qalalar men aýyldardyń barlyq derligin aralap, mıllıondaǵan azamatpen kezdeskenin atap ótti. Onyń aıtýynsha, osy kezdesýler kezinde jastar qaýymy erekshe belsendilik tanytty. Jas azamattar Prezıdent ustanǵan baǵyt nátıjesin ózgelerge qaraǵanda kóbirek sezinedi. Sebebi olar elimizdi ózgertip jatqan reformalardyń bel ortasynda ósip keledi.
— Búgin biz elimizdiń ıdeologııalyq baǵdarynyń tereń ári mazmundy transformatsııasyn baıqap otyrmyz. Іs júzinde ult bolashaǵynyń jańa baǵyty aıqyndaldy. Eń aldymen, osy baǵytty batyl, ózgeristerdi qoryqpaı qarsy alýǵa daıyn el jastary qoldap otyr. Olar úshin reformalar jaı ǵana saıası kún tártibi emes, óz ómirleriniń ajyramas bóligi. Jastar qaýymy úkilegen úmitteri men alǵa qoıǵan josparlary eldiń damý strategııasynan kórinis taýyp jatqanyn baıqap otyr. Dál osy kózqaras toǵysqan tusta Memleket basshysy men jastar arasynda erekshe sınergııa qalyptasady, — dedi ol.
Erlan Qoshanov Jalpyulttyq koalıtsııanyń barsha múshesine, saıası partııalardyń, qoǵamdyq birlestikterdiń, kásipodaqtardyń ókilderine, belsendi jastar men volonterlerge atqarǵan jumystary úshin alǵysyn bildirdi. Az ýaqytta tutas el aýmaǵynda ondaǵan myń is-shara ótkizilip, mıllıondaǵan azamat qamtyldy. Koalıtsııa músheleri túrli mamandyq ıelerimen jáne áleýmettik toptardyń ókilderimen — shahterlermen, metallýrgtermen, stýdenttermen, ǵalymdarmen, dárigerlermen, muǵalimdermen, kásipkerlermen, jastarmen, IT salasynyń mamandarymen, mádenıet jáne óner qaıratkerlerimen birqatar kezdesý ótkizdi.
Shalǵaı aýyldarda, eńbek ujymdarynda, joǵary oqý oryndarynda, aýrýhanalarda, mektepterde, shahtalar men zaýyttarda da mazmundy ári ashyq júzdesýler ótti. Barlyq kezdesý barysynda azamattar jańa Konstıtýtsııa normalary jóninde ashyq pikir bildirip, belsendi túrde suraq qoıyp, óz oılarymen bólisti.
— Bul qoldaýdyń ózegi — qarapaıym azamattardyń Memleket basshysyna jáne onyń bastamasymen júzege asyrylyp jatqan ózgeristerge degen úmiti men senimi. ıAǵnı, elimizdegi ózgeristerdiń basty tiregi — halyqtyń senimi. Eger, halyq bılikke senbese, Prezıdentke arqa súıemese, reformalardy júzege asyrý da, olardy tipti bastaý da qıyn bolatyn edi. Qarapaıym azamattardyń senimi men halyqtyń qoldaýy bizge osyndaı júıeli, tereń ózgeristerdi júzege asyrýǵa kúsh berip otyr, — dedi Memlekettik keńesshi Erlan Qarın.
Premer-Mınıstrdiń orynbasary — Mádenıet jáne aqparat mınıstri Aıda Balaeva jańa Ata Zańda Qazaqstan damýynyń Táýelsizdik pen teńdik, zań men tártip, ádildik pen birlik syndy negizgi qaǵıdattary kórinis tapqanyn atap ótti.
Sondaı-aq Koalıtsııa Prezıdent saıasatyna jáne jańa Konstıtýtsııaǵa qoldaý kórsetý maqsatynda elimizdegi qoǵamdyq-saıası birlestikterdi biriktirgen birtutas kúshke aınalǵany erekshe atap ótildi. Onyń quramyna bes saıası partııa jáne shamamen 300 qoǵamdyq uıym kirdi. Olar shamamen 5 mıllıon qazaqstandyq azamattyń múddesin bildirdi. Bul qoǵamdaǵy túrli ınstıtýttyń kúsh-jigerin elimizdiń jarqyn bolashaǵy jolynda ashyq ári mazmundy jalpyulttyq dıalog júrgizý syndy mańyzdy memlekettik mindet tóńireginde toptastyrýǵa múmkindik berdi.
Іs-shara barysynda Májilis depýtattary Ashat Aımaǵambetov, Irına Smırnova, Janarbek Áshimjanov, Ekaterına Smolıakova, memleket jáne qoǵam qaıratkeri Jaqsybek Qulekeev, «Ádil sóz» halyqaralyq sóz bostandyǵyn qorǵaý qorynyń prezıdenti Qarlyǵash Jamanqulova, Mańǵystaý oblystyq máslıhatynyń depýtaty Aıat Súgirbaı, jýrnalıst Nurbek Matjanı sóz sóıledi.
Otyrys sońynda Koalıtsııa músheleri barsha qazaqstandyqty aldaǵy referendýmǵa qatysýǵa shaqyryp, ár azamattyń daýysy memleket bolashaǵyna jáne Ádiletti ári Progressıvti Qazaqstannyń damýyna yqpal etetinin atap ótti.
