Aldaǵy ózgerister aýqymy jańa Konstıtýtsııa qabyldaǵanmen birdeı – Erlan Qarın
ASTANA. KAZINFORM — Búgin Memleket basshysynyń qatysýymen Parlamenttik reforma jónindegi jumys tobynyń alǵashqy otyrysy ótti. Memlekettik keńesshi Erlan Qarın óziniń Telegram paraqshasynda saıası júıeni odan ári jańǵyrtýǵa baǵyttalǵan qadam týraly jazdy.
Ol jumys tobynyń mindeti Parlamenttik reforma boıynsha usynystar ázirleý ekenin atap ótti.
– Prezıdent Qasym-Jomart Toqaev óz sózinde Parlamentti reformalaý Senatty taratýǵa emes, elimizdiń saıası júıesin odan ári jańǵyrtýǵa baǵyttalǵanyn eske saldy. Memlekettik qurylysymyzdyń «Kúshti Prezıdent – Yqpaldy Parlament – Esep beretin Úkimet» basty formýlasy ózgerissiz qalady. Parlamenttik reformany júzege asyrý úshin Konstıtýtsııanyń shamamen 40 babyna ózgerister men tolyqtyrýlar engizý qajet bolady. Sondaı-aq shamamen 10 Konstıtýtsııalyq zańǵa jáne 50 kodeks pen zańǵa ózgerister engizý talap etiledi. Jumys tobynyń mindeti – Parlamenttik reforma boıynsha usynystar ázirleý. Sol usynystardyń negizinde Konstıtýtsııaǵa engiziletin túzetýler jobasy daıyndalyp, keıin respýblıkalyq referendýmǵa shyǵarylady. Memleket basshysy atap ótkendeı, túptep kelgende aldaǵy ózgerister men tolyqtyrýlardyń aýqymy jańa Konstıtýtsııa qabyldaǵanmen birdeı, - dedi Erlan Qarın.
Aıta keteıik, Memleket basshysy Negizgi zańnyń 40-qa jýyq baby ózgeretinin habarlady.