Endigi maqsat — Olımpıada: Tórehan Sabyrhan men Aıbek Oralbaı aldaǵy josparyn aıtty

20 jastaǵy Tórehan Sabyrhan 70 kelige deıingi salmaqta óner kórsetti. Bul salmaqta otandyq bokstyń jeńisti dástúri qalyptasqan: Olımpıada oıyndarynda dál osy salmaqta Baqtııar Artaev (2004), Baqyt Sársekbaev (2008), Serik Sápıev (2012) jáne Danııar Eleýsinov (2016) altyn medal enshilegen edi. Jas sportshy ıyǵynda úlken jaýapkershilik bar ekenin sezinetinin, biraq bar oıy men kúsh-jigerin jattyǵýǵa arnaıtynyn jetkizdi.

— Almaty áýejaıynda osyndaı ystyq yqylaspen qarsy alǵandaryńyz úshin barshańyzǵa raqmet. Azıada-2026 týrnırindegi jeńisimdi búkil Qazaqstan halqyna arnaımyn. Buǵan deıin bokstan Azııa oıyndaryndaǵy altyn medal Qazaqstanǵa sońǵy ret 12 jyl buryn buıyrǵanyn bilesizder. Osy úzilisten keıin elge qaıtadan Azıada altynyn syılaǵanyma óte qýanyshtymyn. Bul el úshin óte mańyzdy jetistik dep oılaımyn. Jeńistiń syry qarapaıym — ár jekpe-jekti jaqsy ótkizýge tyrystym, — dedi Tórehan Sabyrhan.

2026 jylǵy Azııa oıyndarynyń fınaly Tórehan úshin erekshe mańyzdy boldy. Sebebi ol 2026 jylǵy Azııa chempıonatynyń fınalynda ıordanııalyq Zeıad Ishaıshten utylyp qalǵan edi. Al bul joly odan senimdi túrde qarymta qaıtara aldy.

— Daıyndyqtyń óte joǵary deńgeıde ótkeni qatty kómektesti. Azııa chempıonatyndaǵy jeńilisten keıin qatelermen muqııat jumys istedik, sonyń ishinde Amerıkaǵa oqý-jattyǵý jıyndaryna bardyq. Onda kemshil tustarymdy jóndep, dene daıyndyǵyn arttyrdyq, durys qalpyna kelý kestesin jasap, rıngte qalaı bokstasý keregin, qandaı ádis-tásilderdi qoldaný qajettigin pysyqtadyq. Osynyń bárin Amerıkada bas bapker Nurjan Nasanovpen jáne ózimniń jeke bapkerim Ilıas Oralbekovpen birge shyńdadyq. Árıne, fınalda tartys boldy, biraq men bar kúshimdi salyp, jeńiske jettim, — dedi Tórehan Sabyrhan.

Sportshy Azıadadan keıin sál demalyp, daıyndyqty qaıta jalǵastyratynyn aıtty. Óıtkeni 2027 jyly Astanada lıtsenzııalyq álem chempıonaty, al 2028 jyly Olımpıada oıyndary ótedi.

Azııa oıyndarynyń bokstan taǵy bir chempıony, ulttyq qurama kapıtany, 26 jastaǵy Aıbek Oralbaı da AQSh-taǵy jattyǵý jıyndary tekke ótpegenin jáne muhıttyń arǵy jaǵynda jasalǵan jumys Azııa oıyndarynda óz nátıjesin bergenin atap ótti.

— Aman-esen oralǵanymyzǵa óte qýanyshtymyz. Japonııada tutas bir aı bolyp, oqý-jattyǵý jıyndarynan óttik ári sátti óner kórsettik. Nátıjege kóńilimiz tolady, biraq aldymyzda álem chempıonaty kútip tur, al basty maqsatymyz — Olımpıada. Olımpıada oıyndarynda árqaısysymyz medal alýymyz kerek, — dedi Aıbek Oralbaı.

Eske salaıyq, Japonııada 2026 jylǵy Azııa oıyndary resmı túrde aıaqtaldy.

Azıadaǵa qatysqan boksshylar men dzıýdoshylar elge oraldy. Olardy saltanatty túrde Almaty áýejaıynda qarsy aldy.