Aldaǵy onjyldyqta sırek kezdesetin mıneraldar dekarbonızatsııalaý boıynsha baǵa jetpes resýrsqa aınalady - Toqaev
Aldaǵy onjyldyqta sırek kezdesetin mıneraldar dekarbonızatsııalaý boıynsha baǵa jetpes resýrsqa aınalady. Al Qazaqstan onyń jetkizýshisi bolady.
QR Prezıdenti Qasym-Jomart Toqaev Klımat jónindegi dúnıejúzilik sammıtte sóılegen sózinde osylaı dedi, dep habarlaıdy Kazinform Aqordanyń baspasóz qyzmetine silteme jasap.
«Qazaqstan bolashaq urpaq úshin qorshaǵan ortany saqtaýǵa baǵyttalǵan naqty sharalar qabyldaý jónindegi BUU-nyń kókeıtesti úndeýin tolyq qoldaıdy.
Biz Parıj kelisimin ratıfıkatsııalaǵan aımaqtaǵy birinshi elmiz jáne 2060 jylǵa deıin kómirtegi beıtaraptyǵyna qol jetkizý strategııasyn qabyldadyq»,-dedi Memleket basshysy.
Sondaı-aq ol sózinde Qazaqstannyń jańa Ekologııa kodeksi ulttyq ekonomıkamyzdyń árbir sektorynda «jasyl» tehnologııalardy keńinen qoldanýǵa yqpal etetinin atap ótti.
«Elimizde jel men kún energııasyn paıdalaný, sondaı-aq «jasyl» sýtegin óndirý úshin zor áleýet bar. Biz osy múmkindikti paıdalaný maqsatynda seriktesterimizben aradaǵy tyǵyz yntymaqtastyqty jalǵastyramyz. Qazaqstan – ýran eksporttaıtyn álemdegi jetekshi memleket.
Bul rette elimiz dúnıejúzi boıynsha ýrannyń 43 paıyz tasymalyn qamtamasyz etedi. Biz jahandyq deńgeıde elektr energııasyn kómirtegi qaldyqtarynsyz óndirý isinde sheshýshi ról atqaramyz»,-dedi Qasym-Jomart Toqaev.
Osy rette ol shyn máninde, aldaǵy onjyldyqta asa mańyzdy mıneraldar, sonyń ishinde sırek kezdesetin mıneraldar álemdi dekarbonızatsııalaý deńgeıi boıynsha baǵa jetpes resýrsqa aınalalatynyn, al Qazaqstan ótpeli kezeńde osyndaı mıneraldardyń negizgi jetkizýshisi bolýǵa daıyn ekenin atap ótti.
«Sonymen qatar biz jekelegen «jasyl» bastamalardy belsendi túrde qoldaımyz. Mysaly, Qazaqstannyń qaptaýshylar qaýymdastyǵy plastıkalyq qaldyqtardan qutylý jónindegi jobalardy júzege asyrý arqyly ekologııany qorǵaýǵa óz úlesin qosyp otyr.
Klımatty qorǵaý úshin ekonomıkasy damyp kele jatqan elderden ulttyq órkendeýi men jańǵyrýyn qurban etýdi talap etpegen jón. Bul prıntsıpti ári ádiletti ustanym dep sanaımyn. Kerisinshe, atalǵan maqsattar qatar júrýi jáne bir-birine dem berýi kerek. Osy oraıda batyl qadamdar jasaý qajet»-dedi Prezıdent.
