Aldaǵy Olımpıadaǵa da sapaly daıyndyq júrgizý qajet - Oljas Bektenov
ASTANA. KAZINFORM – Sport nysandarynda kórsetiletin qyzmetterdiń baǵasy turǵyndarǵa qolaıly bolýy tıis. Bul týraly Úkimet otyrysynda Premer-mınıstr Oljas Bektenov málim etti.
- Azııa oıyndary – óńirdegi eń iri sporttyq sharalardyń biri. Sonymen qatar bul – sportshylarymyzdyń Olımpıadaǵa daıyndyq deńgeıin tekserýge arnalǵan jaqsy múmkindik. Baıraqty básekeni nebári bir jyldan keıin Mılanda ótetin qysqy Olımpıada qarsańyndaǵy eń basty jarys alańy deýge bolady. Sondyqtan Azııa oıyndarynda jaqsy nátıje kórsetip qana qoımaı, aldaǵy Olımpıadaǵa da sapaly daıyndyq júrgizý qajet. Elimizdiń klımattyq jaǵdaıy qysqy sport túrlerin damytýǵa qolaıly. Qajetti ınfraqurylym da bar. Qazaqstanda qysqy Azııa oıyndary, Kýbok kezeńderi men álem chempıonattary sııaqty halyqaralyq jarystar sátti ótkizildi. Munyń barlyǵy halyqtyń qysqy sport túrlerimen aınalysýǵa degen qyzyǵýshylyǵyn arttyra túsedi. Sporttyq týrızmge tyń serpin beredi, - dedi O.Bektenov.
Onyń aıtýynsha, elimizdegi shańǵy trassalary týrısterge toly. Bul rette sporttyq ınfraqurylym nysandaryn dáripteý jumysyn jandandyra túsý qajet.
- Mysaly, byltyr Shymbulaq bókterine kelgen shańǵyshylardyń sany 1,5 mıllıonnan asyp ketti. Shańǵy teýip, taza aýamen tynystap qaıtýshylardyń qatary onyń táýliktik qýatynan áldeqaıda kóp bolyp otyr. Sondyqtan kýrortty odan ári damytyp, Almatymen qatar Almaty oblysynda, Shyǵys Qazaqstan óńirinde jáne basqa da aımaqtarda jańadan taý shańǵysy trassalaryn jasaý qajet. Týrızm jáne sport mınıstrligi men ákimdikter ınvestorlardy tartyp, sport ınfraqurylymyn salý úshin qolaıly jaǵdaılar jasaýy kerek. Sonymen birge, barlyq sport obektileri qalyń kópshilikke qoljetimdi bolyp qalýǵa tıis. Bul sportpen shuǵyldanýshylar sanyn ulǵaıtyp, osy obektilerdiń aınalasynda bıznestiń damýyna jol ashady. Ákimdikter men kásipkerler atalǵan baǵytta belsendi jumys isteýi kerek, - dedi Úkimet basshysy.
Onyń paıymynsha, kórsetiletin qyzmetterdiń baǵasy da kelýshiler úshin qoljetimdi bolýǵa tıis. Tek sonda ǵana halyqty kóptep tartýǵa múmkindik týady. Ol bıznes pen sport-týrıstik obektilerdiń aınalasyndaǵy eldi mekenderge mýltıplıkatıvti áser beredi.
Budan buryn habarlanǵandaı, búgin Úkimet otyrysynda QR Týrızm jáne sport mınıstri Erbol Myrzabosynov elimizde qysqy sport túrleriniń damýyna qatysty túsinik berdi.