Aldaǵy oqý jylynda Pavlodar mektepterinde 116 myńnan asa oqýshy bilim alady

PAVLODAR. KAZINFORM — 1 qyrkúıekten bastap 360 mektepte 116 myńnan astam oqýshy bilim alatyn bolady. Onyń ishinde 10 552 bala alǵash ret mektep tabyldyryǵyn attaıdy.

Bul týraly Pavlodar oblysy ákiminiń baspasóz qyzmetinen habarlady.

— 2025-2026 oqý jylynda óńirde 840 bilim berý uıymy jumys isteıtin bolady jáne barlyq bala úshin sapaly qyzmetterge teń dárejede qoljetimdilikti qamtamasyz etýge nazar aýdarylady. Bıyl 2 jastan 6 jasqa deıingi balalardy qamtý kórsetkishin ulǵaıtýǵa múmkindik beretin 220 oryndyq tórt jańa balabaqsha ashylady. Bul rette aýqymdy qarjylandyrý reformasy jalǵasýda: «aqsha balanyń sońynan júredi» vaýcherlik qaǵıdaty engizilip jatyr. Búgingi tańda bul tetikpen Pavlodardyń mektepke deıingi 83 uıymy qamtylyp, 7545 vaýcher berildi, — dep málimdedi ákimdikten.

Jaıly bilim berý ortasyn qurýǵa kóńil bólinip otyr. 32 mektepte jóndeý jumystary júrgizilýde jáne búginde onyń basym bóligi aıaqtalǵan. Sonymen qatar, 21 mektepte 427,2 mln teńgege jańa oqý kabınetteri paıda boldy.

Osylaısha jańa oqý jylynda jalpy sany 116 myńnan astam oqýshynyń qolaıly jaǵdaıda bilim alýy qamtamasyz etiledi.

Buǵan deıin Ertis boıynda mektepterde oryn tapshylyǵy qalaı sheshilip jatqany týraly jazǵanbyz.