Aldaǵy merekeler qarsańynda bazarlarda baǵa baqylaýy kúsheıtiledi – Saýda mınıstrligi
ASTANA. KAZINFORM – Mınıstr aldaǵy merekelerde bazar basshylaryn baǵany turaqty deńgeıde ustap turýǵa, jeńildikter men aktsııalar uıymdastyrýǵa shaqyrdy. Bul týraly Saýda jáne ıntegratsııa mınıstrliginiń baspasóz qyzmeti habarlady.
Saýda jáne ıntegratsııa mınıstri Arman Shaqqalıev elimizdegi iri bazar ıelerimen kezdesý ótkizdi. Jıynǵa shamamen 100 bazardyń basshysy, sondaı-aq Aýyl sharýashylyǵy, Tótenshe jaǵdaılar, Densaýlyq saqtaý, Іshki ister mınıstrlikteriniń, Memlekettik kirister komıtetiniń jáne jergilikti atqarýshy organdardyń jaýapty ókilderi qatysty.
Mınıstr bazarlardy jańǵyrtý jumystarynyń bıznes pen turǵyndar úshin mańyzy zor ekenin atap ótti. Infraqurylymdy jańartý sanıtarııalyq jáne órt qaýipsizdigi talaptarynyń saqtalýyn jaqsartyp qana qoımaı, satýshylar men satyp alýshylarǵa qolaıly jaǵdaı qalyptastyrýǵa múmkindik beredi.
Bazarlardy jańǵyrtý sharalary ortalyq jáne jergilikti memlekettik organdarmen birlesip iske asyrylyp jatyr. Saýda jáne ıntegratsııa mınıstrligi saýda salasyn damytý jáne bazarlardyń zamanaýı formattaryn engizý maqsatynda qosymsha qoldaý tetikterin usynyp otyr.
Arman Shaqqalıevtiń aıtýynsha, azyq-túlik baǵasynyń turaqtylyǵy mınıstrlik qyzmetindegi basym baǵyttardyń biri.
Mınıstr bazardaǵy baǵa aımaqtardaǵy jalpy baǵanyń ahýalyna tikeleı áser etetinin erekshe atap ótti. Sondyqtan alypsatarlyqqa jol berýge bolmaıdy. Taýardy arzan baǵada alyp, negizsiz joǵary baǵamen satý azamattardyń qaltasyna salmaq túsirip, áleýmettik turaqtylyqqa keri áser etedi.
— Mınıstr aldaǵy merekelerde bazar basshylaryn baǵany turaqty deńgeıde ustap turýǵa, jeńildikter men aktsııalar uıymdastyrýǵa shaqyrdy. Ol osyǵan deıin uıymdastyrylǵan «Bereke Fest» aktsııasyn mysalǵa keltirip, onyń barysynda azyq-túlik pen ózge de taýarlardyń arzan baǵamen satylǵanyn eske saldy. Jyl sońyna josparlanǵan aktsııanyń jańa kezeńine bazar ákimshiliginiń belsendi qatysýy baǵanyń ósýine jol bermeı, halyqtyń shyǵyndaryn azaıtýǵa yqpal etetini aıtyldy, — delingen habarlamada.
Saýda jáne ıntegratsııa mınıstrligi bazar basshylaryn ákimdiktermen ózara tyǵyz baılanysta jumys isteýge, baǵa qalyptastyrý protsesinde ashyqtyqty qamtamasyz etýge jáne áleýmettik jaýapkershilik tanytýǵa shaqyrdy.
Aıta ketelik Almatyda taýyqtyń san etine bekitilgen baǵa qoıylǵan edi.