Aldaǵy kúnderi Taıaý Shyǵystan qansha adam elge jetkiziletini málim boldy
ASTANA. KAZINFORM — Evakýatsııa bastalǵaly beri Taıaý Shyǵys elderinen 6 myńǵa jýyq qazaqstandyq elge qaıtarylǵan. Bul týraly Syrtqy ister mınıstrliginiń resmı ókili Erlan Jetibaev málim etti.
— Qazaqstannyń Syrtqy ister mınıstrligi ýákiletti memlekettik organdarmen birlesip, Taıaý Shyǵystaǵy qaqtyǵys aımaǵynan Qazaqstan azamattaryn elge qaıtarý jumystaryn jalǵastyryp jatyr. Biz otandastarymyzdyń qaýipsizdigin qamtamasyz etý úshin bar kúsh-jigerimizdi salýdamyz jáne kez kelgen jaǵdaıda jan-jaqty qoldaý kórsetip jatyrmyz. Qazirgi ýaqytqa deıin Qazaqstan Respýblıkasy azamattarynyń arasynda zardap shekkender nemese qaza bolǵandar týraly aqparat túsken joq. Evakýatsııa bastalǵaly beri ýákiletti memlekettik organdardyń rezıdent jáne rezıdent emes áýe kompanııalarynyń kómegimen 8585 qazaqstandyq elge qaıtaryldy, — dedi Erlan Jetibaev mınıstrliktegi baspasóz máslıhatynda.
Onyń aıtýynsha, aldaǵy kúnderi Izraılden — 78, Qatardan — 350, Birikken Arab Ámirlikterinen — 550, Saýd Arabııasynan 300 adamdy evakýatsııalaý josparlanǵan.
— Áýe reısterinen bólek, azamattardy shyǵarý jerústi joldary arqyly da qarastyrylǵan. Atap aıtqanda, Ázerbaıjan, Armenııa jáne Túrikmenstannyń qurlyqtaǵy shekaralary arqyly evakýatsııalaý júzege asyp jatyr. Barlyǵy, Irannan 66 adam elge qaıtaryldy, — dedi resmı ókil.
Budan buryn habarlanǵandaı, Qazaqstan Syrtqy ister mınıstrligi quzyrly memlekettik organdarmen birlesip, Taıaý Shyǵystan azamattarymyzdy qaıtarý jumystaryn jalǵastyryp jatyr.
