Aldaǵy kúnderi kún sýytady
ASTANA. KAZINFORM — «Qazgıdromet» RMQ 9-11 sáýirge arnalǵan aýa raıy boljamyn jarııalady.
Aldaǵy kúnderi Qazaqstannyń basym bóliginde aýa raıy qubylmaly bolyp saqtalady, jańbyr jaýady.
9 sáýirde respýblıkanyń soltústik-batysynda, soltústiginde jáne ońtústik-shyǵysynda, 10 sáýirde batysynda, soltústiginde jáne ońtústik-shyǵysynda naızaǵaı, burshaq jaýyp, ekpindi jel turyp, jańbyr jaýady.
Túngi ýaqytta soltústik-batys pen soltústikte jaýyn-shashyn (jańbyr, qar) boljanady, al 11 sáýirge qaraǵan túni eldiń shyǵysynda qar, jaıaý burqasyn jáne kóktaıǵaq bolady.
Respýblıka boıynsha jel kúsheıip, túngi jáne tańǵy ýaqytta tuman bolady.
Soltústik, soltústik-batys, ortalyq jáne shyǵys óńirlerde aýa temperatýrasynyń tómendeýi kútiledi:
túnde 0–8 gradýs jylydan 0–5 gradýs aıazǵa deıin,
kúndiz 10–23 gradýstan 7–15 gradýsqa deıin.
Eldiń qalǵan aýmaqtarynda aýa temperatýrasy kóktemge tán jaıly deńgeıde saqtalady.
Aıta ketelik sınoptıkter búgin 7 qalada aýa sapasynyń tómendeıtinin habarlaǵan edi.
